ფეხბურთის ფედერაციის პრეზიდენტის ლევან კობიაშვილის განცხადებით კახა ცხადაძესთან მოლაპარაკებები ძალიან ცივილურ ფორმატში მიმდინარეობდა, თუმცა ცხადაძის მოტხოვნა ფედერაციისთვის მიუღებელი აღმოჩნდა.
„ფეხბურთის ფედერაციას რომ ეუბნები, ფინანსური პრობლემა კი გაქვს, მაგრამ მიდი სახელმწიფოსთან და ჩემი ფული მოითხოვე, ჩემთვის მიუღებელია. როგორ წარმოგიდგენიათ, სახელმწიფოსთან მივიდე და 2 წელიწადში 3 მილიონის გამოყოფა ვთხოვო, რომ კახა ცხადაძეს ხელფასი გადავუხადო?! შედეგი თუ იქნება, მზად ვართ, დიდი თანხები გადავიხადოთ. ჩვენ კონტრაქტის ცალმხრივად გაწყვეტა არ გვსურს. ყველაფერი მოლაპარაკებების შედეგად უნდა გადაწყდეს, რისთვისაც მზად ვართ. ცხადაძესთან საუბარი გვქონდა. მისგან იყო წინადადება, რომ ზაფხულამდე ახალ გუნდს ვერ ნახავდა და გარკვეული თანხა გადაგვეხადა." - განაცხადა კობიაშვილმა და აღნიშნა, რომ ცხადაძემ სცადა ეს ყველაფერი პოლიტიკურ ჭრილში გადაეტანა.
„ეს იყო მიზანმიმართული კამპანია. კახა ეცადა, ყველაფერი პოლიტიკურ ჭრილში გადაეყვანა. თითქოს, ფედერაცია არაფერს წყვეტს, კობიაშვილს ვიღაც მიუთითებს, მის ადგილას რომელიღაც კანდიდატის მოყვანა სურთ და ა.შ. ყველაფერი იმისთვის გააკეთა, რომ ზეწოლა გარედან განეხორციელებინა და ფედერაციასთან ულტიმატუმის ენით ესაუბრა. სახელმწიფომ თანხები რომც მოგვცეს, მწვრთნელისთვის კოლოსალური თანხების გადახდა და საერთოდ, ასეთ სახელფასო სისტემაზე დარჩენა, მაინც არასწორად მიგვაჩნია."
