„პრემიერ-მინისტრთან შეხვედრა ჯერჯერობით განსაკუთრებული მოლოდინების მატარებელი არ არის. თუმცა, პოზიტიურია ის, რომ ეს შეხვედრა შედგა", - ამის შესახებ „გაერთიანებული დემოკრატიული მოძრაობის" წევრმა გიორგი ახვლედიანმა „რეპორტიორის" პრესკლუბში გამართულ ბრიფინგზე ისაუბრა. როგორც ახვლედიანმა განმარტა, ხელისუფლებას მხოლოდ 1 კვირა აქვს დარჩენილი, რომ საშემოდგომო სესიაზე რიგგარეშე საპარლამენტო სხდომა მოიწვიოს და 2016 წლისთვის საარჩევნო სისტემის ცვლილება განიხილოს.
„პრემიერ-მინისტრთან შეხვედრა ჯერჯერობით განსაკუთრებული მოლოდინების მატარებელი არ არის. ილუზიებს არც ჩვენ ვიქმნით და არც საზოგადოებას ვუქმნით. პოზიტიურია ის, რომ ეს შეხვედრა შედგა. თუმცა, რეალურ პოზიტივზე ვისაუბრებთ მას შემდეგ, რაც დავინაცავთ, რომ თემა, რომელზეც შეხვედრა შედგა, დღის სინათლეს ნახავს და ეს ყველაფერი საქმეში აისახება. ჩვენი მთავარი მიზანია საარჩევნო სისტემის ცვლილება და ერთმანდატიანი ოლქების გაუქმება.
ჩვენი მოთხოვნაა საგაზაფხულო სესიამდე პარლამენტში ჩატარდეს რიგგარეშე სხდომა, რომელზეც უნდა გავიდეს საკონსტიტუციო ცვლილების პროექტი, 240 000 ამომრჩევლის ხელმოწერით, რომელიც სწორედ 2016 წელს საარჩევნო სისტემის ცვლილებას გულისხმობს. ამასთან დაკავშირებით ბატონმა პრემიერმა გვითხრა, რომ უახლოეს დღეებში გაივლის კონსულტაციებს თავის გუნდთან და შემდეგ გადაწყვეტს, თუ რამდენად არის რიგგარეშე სხდომის ჩატარების პერსპექტივა. ეს არის ყველაზე მნიშვნელოვანი, ყველაზე მთავარი საკითხი. თუ ეს ასე არ მოხდება, სიტუაცია გაცილებით რთული იქნება, რადგან რეგლამენტით ვეღარ მოვასწრებთ საკონსტიტუციო ცვლილების განხორციელებას და დავრჩებით მხოლოდ კოდექსის შეცვლის ამარა", - განაცხადა ახვლედიანმა.
