საპარლამენტო უმრავლსობის წევრი ალექსანდრე ქანთარია საგარეო საქმეთა მინისტრ მიხეილ ჯანელიძესთან დაკავშირებით დღეს გაკეთებულ განცხადებას განმარტავს და „რეპორტიორთან" საუბარში აღნიშნავს, რომ მას ჯანელიძის კომპეტენცია არ დაუწუნებია. როგორც ქანთარია განმარტავს, მიხეილ ჯანელიძეს არ გააჩნია ის მრავალწლიანი გამოცდილება, რომელიც, მისი თქმით, სერგეი ლავროვთან პირისპირ საუბრისთვისაა საჭირო.
„უფრო დაკვირვებით უნდა გაეცნონ ჩემს განცხადებას. მე ვთქვი და ალბათ არავისთის გამოცანა არ არის, რომ ისეთ პოლიტიკურ ვეშაპთან, როგორიც ლავროვია და ასეთ ურთულეს პოლიტიკურ თემაზე პირისპირ საუბრისას საჭიროა მრავალწლიანი გამოცდილების მქონე ადამიანის დაჯდომა. მიხეილ ჯანელიძე არის ძალიან ნიჭიერი კაცი, ძალიან მცოდნე ადამიანი, მაგრამ ბუნებრივია, ასაკის მიხედვითაც და პრაქტიკის მიხედვითაც, მას არ გააჩნია ისეთი მრავალწლიანი გამოცდილება, რომ ასეთ მოწინააღმდეგესთან დიპლომატიურ მოედანზე დაჯდეს. ამისთვის სერიოზული მომზადება გვჭირდება.
ჩემს კომენტარში მე კომპეტენცია არ მიხსენებია. კომპეტენცია ცოდნას შეიცავს და მე კი გამოცდილებაზე ვსაუბრობდი", - განაცხადა ქანთარიამ.
