„რუსთავი 2"-ის ეთერში, გადაცემა „პროფილში" დღეს დაანონსებულ გადაცემასთან დაკავშირებით, შეშფოთება გამოთქვა სახალხო დამცველმა უჩა ნანუაშვილმა. ომბუდსმენმა მოუწოდა ტელეკომპანიას, არ გაუშვას დღევანდელი გამოშვება ეთერში.

ანალოგიური თხოვნით მიმართა ტელეკომპანიას პარლამენტის ჯანდაცვისა და სოციალურ საკითხთა კომიტეტის თავმჯდომარე დიმიტრი ხუნდაძემ. http://reportiori.ge/?menuid=3&id=87418

გადაცემის ავტორი მაია ასათიანი აცხადებს, რომ დღევანდელი „პროფილი" არ ეძღვნება ბავშვთა სუიციდს და ეს არ არის მისი მთავარი თემა. გთავაზობთ განცხადებას, რომელიც „პროფილის" facebook-გვერდზე გავრცელდა:

„დღევანდელი გადაცემა არის არა სუიციდზე, როგორც ამას ის ადამიანები ამტკიცებენ, ვისაც გადაცემა არ უნახავს, არამედ სუიციდის პრევენციაზე! გადაცემის სტუმრები, გამოცდილი და ძალზე კომპეტენტური ფსიქოლოგები და ფსიქიატრები მსჯელობენ, როგორ დავეხმაროთ გარდატეხის ასაკში მყოფი შვილების მშობლებს პრობლემების დაძლევაში! მოვუწოდებ ყველას, ხელოვნურად ნუ ქმნიან სკანდალს იქ, სადაც ის არ არის. არ მესმის, რატომ კეთდება წინასწარი შეფასებები, როცა გადაცემა არავის უნახავს. დღევანდელი „პროფილი" არ არის სუიციდზე!" - ნათქვამია განცხადებაში.

ამასთან, მაია ასათიანი დღეს, 21 საათზე, „კურიერის" ეთერში საგანგებო განცხადებას გააკეთებს.