ახალგაზრდა ფინანსისტთა და ბიზნესმენთა ასოციაცია ონლაინ-კაზინოების დარეგულირების კონცეფციაზე მუშაობს. როგორც „აფბას" ანალიტიკოსი ზურაბ კუკულაძე აცხადებს, საქართველოში სხვადასხვა ონლაინ-კაზინოში 400 000 ადამიანია დარეგისტრირებული. კუკულაძე მიიჩნევს, რომ თავდაპირველად ონლაინ-კაზინოებზე გარკვეული შეზღუდვები უნდა დაწესდეს და შემდეგ სრულად უნდა აიკრძალოს. მისივე თქმით, ონლაინ-კაზინოებმა პირველ ეტაპზე წაგების ლიმიტი უნდა დააწესონ და არ უნდა ჰქონდეს თამაშის უფლება იმ ადამიანს, რომელსაც შემოსავალი არ გააჩნია.
„საქართველოში 400 000 ადამიანია დარეგისტირებული სხვადახვა ონლაინ-კაზინოებში. ეს კატასტროფული ციფრია ჩვენი ქვეყნისთვის. ეკონომიკური თვალსაზრისით, ონლაინ-კაზინოები არაფრის მომტანია. ისინი არ იხდიან არანაირ მოსაკრებელს, განსხვავებით რეალური კაზინოებისგან. მათზე სახელმწიფო კონტროლი ფაქტობრივად არ არსებობს. ასე გადის საქართველოს ეკონომიკიდან ძალიან ბევრი მილიონი. 2015 წელს 2 მილიარდამდე ავიდა ონლაინ-კაზინოებში ბრუნვა. ამხელა ფული ისეთ სივრცეშია, რომელიც ეკონომიკის განვითარებას არ ხმარდება.
მიგვაჩნია, რომ არასწორი იქნება ონლაინ-კაზინოების აკრძალვის მოთხოვნა ამ ეტაპზე. ჩვენ ვთვლით, რომ პირველ ეტაპზე უნდა დაწესდეს გარკვეული შეზღუდვები და მერე გადავიდეთ შემდეგ ეტაპზე - აკრძალვაზე. ონლაინ-კაზინოებმა უნდა დააწესონ წაგების ლიმიტები, მაგალითად, ნორვეგიაში ეს ლიმიტი 300 ევროა. გარდა ამისა, თუ მოთამაშეს არ აქვს შემოსავალი, მას არ უნდა ჰქონდეს თამაშის უფლება. თუ აქვს შემოსავალი, ამ შემოსავლის გარკვეული პროცენტის წაგების უფლება უნდა ჰქონდეს მხოლოდ", - განაცხადა ზურაბ კუკულაძემ.
(მოამზადა ნენე სტეფანიშვილმა)
წყარო: „ალია"
