დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, გასულ კვირასთან შედარებით ამ კვირაში გრიპის ვირუსის შემთხვევების რადიკალური ზრდა არ დაფიქსირებულა.
„მესამე კვირის მონაცემებით, 100 000 მოსახლეზე 332 შემთხვევა ფიქსირდება, IV კვირის მონაცემები კი, ორშაბათს დაჯამდება. გრიპის ვირუსის ეპიდემიისგან ძალიან შორს ვართ. სასკოლო და სკოლამდელი აღზრდის დაწესებულებებში სასწავლო პროცესის სამი დღით შეჩერება პრევენციის მიზნით ხდება - სასურველია, გრიპის ვირუსის გადაცემის ჯაჭვის გასაწყვეტად სკოლაში სწავლა შეწყდეს. მინდა, მოსახლეობა დავამშვიდო, საპანიკო სიტუაცია არ არის: იანვარია, წელს ოდნავ მეტია შემთხვევების რაოდენობა გასული წლის ანალოგიურ პერიოდთან შედარებით, მაგრამ ეს არ არის კატასტროფული ზრდა. ჯანდაცვის სისტემა მზად არის, ამ გამოწვევას უპასუხოს", - განაცხადა ამირან გამყრელიძემ.
