საპარლამენტო უმრავლესობის წევრი გედევან ფოფხაძე პრემიერ-მინისტრის ინიციატივას, რომელიც ფიზიკური შეურაცხყოფისთვის სასჯელის გამკაცრებას გულისხმობს, ეხმაურება და აცხადებს, რომ „ცოტა უფრო მკაცრად უნდა მოვექცეთ იმ ადამიანებს, რომლებიც საარჩევნო პროცესს ხელს უშლიან". როგორც ფოფხაძემ „რეპორტიორთან" საუბარში განმარტა, ისეთი დაპირისპირებები, როგორიც 28 იანვარს გარდაბნის არჩევნებზე მოხდა, კითხვის ნიშნის ქვეშ აყენებს ხელისუფლების ლეგიტიმურად შექმნის მექანიზმებს.
„მომერიდება, კატეგორიული ვიყო, მაგრამ ზოგადად, ასეთი დაპირისპირება საფრთხეს უქმნის საარჩევნო პროცესს და კითხვის ნიშნის ქვეშ აყენებს ხელისუფლების ლეგიტიმურად შექმნის მექანიზმებს. პროცესი უნდა იყოს მშვიდობიანი. ვიღაცა არ უნდა შეფერხდეს ამის გამო და არჩევნებზე მისვლისგან თავის შეკავება არ უნდა მოუწიოს. ლოგიკურია, რომ ცოტა უფრო მკაცრად მოვექცეთ იმ ადამიანებს, რომლებიც საარჩევნო პროცესს ხელს უშლიან. საარჩევნო პროცესისთვის საფრთხის შემცველი მარტო გაყალბება, ბიულეტენების ჩაყრა და უბნებზე მანიპულაციები არ არის. არაჯანსაღი გარემოს შექმნა საარჩევნო უბის გარეთ ასევე საფრთხის შემცველია", - განაცხადა გედევან ფოფხაძემ.
შეგახსენებთ, საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე განაცხადა, რომ ფიზიკური შეურაცხყოფისთვის საქართველოში მსუბუქი სასჯელებია გათვალისწინებული, მაშინ როდესაც ბევრ ცივილიზებულ ქვეყანაში რეგულაციები უფრო მკაცრია.
აღნიშნულის კონტექსტში მთავრობის მეთაურმა იუსტიციის მინისტრს თეა წულუკიანს შესაბამისი კანონმდებლობის გადახედვა სთხოვა.
„მინდა, ვთხოვო იუსტიციის მინისტრს, იქნებ გადახედოთ, რას ითვალისწინებს ფიზიკური შეურაცხყოფისთვის ჩვენი კოდექსი. რამდენადაც ვიცი, იქ არის ფულადი ჯარიმები თუ სხვა ასეთი საკმაოდ მსუბუქი სასჯელი. მე არ მინდა, რომ მეორე უკიდურესობაში გადავვარდეთ, მაგრამ ძალიან ბევრ ცივილიზებულ ქვეყანაში ფიზიკური შეურაცხყოფისთვის უფრო მკაცრი სასჯელებია გათვალისწინებული. იქნებ ამ კუთხითაც გარკვეული პრევენცია გაგვეკეთებინა არჩევნებამდე", - განაცხადა გიორგი კვირიკაშვილმა.
