„ზოგადად ადამიანების შეგნებაზე უფროა ეს ყველაფერი დამოკიდებული და არა 300-ლარიან ჯარიმაზე", - ასე ეხმაურება საპარლამენტო უმრავლესობის წევრი თემურ ჭკუასელი რელიგიური გრძნობების შეურაცხყოფაზე ადმინისტრაციული ჯარიმის შესაძლო დაკისრებას. როგორც ჭკუასელმა „რეპორტიორთან" საუბარში განაცხადა, იგი მხარს არ დაუჭერს აღნიშნულ კანონპროექტს, თუმცა, ზოგადად ნებისმიერი ნიშნით შეურაცხყოფის წინააღმდეგია.

„განათლებაა საჭირო და ადამიანის აღზრდა ისე, რომ არც რელიგიური ნიშნით და არც სხვა რაიმე ნიშნით შეურაცხყოფა არ მიაყენონ ერთმანეთს. მსგავსი კანონი მსოფლიოში სულ 2 ქვეყანაშია მიღებული და იქაც გაუქმებას აპირებენ. თავად ასეთი კანონის შემოღებას მხარს არ ვუჭერ, მაგრამ მიმაჩნია, რომ მსგავსი რამ არ უნდა ხდებოდეს", - განაცხადა თემურ ჭკუასელმა.