„ამ მაესტროსთან, რა მდგომარეობაშიც დღეს არის ტელეკომპანია, არც ერთ დამფუძნებელს არ გვინდა, რომ ვასოცირდებოდეთ."- განაცხადა ტელეკომპანია „მაესტროს" 55%-ის წილის მფლობელმა გია გაჩეჩილაძემ თოქ შოუ „რვიანში" საუბრისას.

 გაჩეჩილაძის თქმით ტელეკომპანია დღეს ძლიერ კრიზისს განიცდის, რაზეც „მაესტროს" რეიტინგის ვარდნა მეტყველებს. სწორედ ამიტომ დამფუძნებლებმა გადაწყვიტეს, ერთობლივი მოლაპარაკებების გზით ტელეკომპანია ჩიხიდან გამოიყვანონ.

„როდესაც ტელეკომპანია დღევანდელმა მმართველობამ ჩაიბარა, მაშინ მაესტროს 25%-ანი რეიტინგი ჰქონდა, დღეს აქვე 4%-ანი რეიტინგი. ეს არავის აწყობს, არ გვინდა, რომ მაესტრო ასეთ ცუდ მდგმარეობაში იყოს.

გარკვეული მიზეზების გამო გაწეულები ვიყავით გვერდზე. ბაია გადაბაძის დანიშვნაში მე ვმონაწილეობდი, მე მოვაწერე ხელი მის დანიშვნას, როდესაც ადამიანი დირექტორი ხდება, მას დროც უნდა მისცე და უყურო თუ რა ხდება. მე 25%-ანი წილის ფლობელი კი ვიყავი, მაგრამ გაწეული ვიყავი და არ ვერეოდი არც ფინანსურ მხარეში, არც მხატვრულ მხარეში. როდესაც დადგა საკითხი  მაესტროს გაკოტრება- არ გაკოტრების შესახებ, ჩვენც ჩავერიეთ.

კოტე გოგელიასთან საუბარი დიდი ხანია მიმდინარეობს. მან ეს ყველეფრი იცის. როდესაც ამდენი კარგი ჟურნალისტი წავიდა ტელეკომპანიდდან, ეს ყველაფერი რაღაცაზე მეტყველებს ხომ? რაღაც უნდა შეცვლილიყო."- განაცხადა გია გაჩეჩილაძემ.