„უახლოეს დღეებში დაიწყება ახალი პიარკამპანია, რომ ერთსქესიანთა ქორწინების დაკანონება არარეალურია, არ ღირს კონსტიტუციაში შესწორების შეტანა. ისიც ზუსტად ვიცი, თუ რომელ პოლიტიკურ პარტიაში დამუშავდა ეს ახალი გეგმა", - ამ განცხადებას დიასპორის საკითხებში სახელმწიფო მინისტრის მოადგილე სანდრო ბრეგაძე „რეპორტიორთან" საუბრისას აკეთებს და ამბობს, რომ იმ შემთხვევაში, თუ მხარდაჭერილი არ იქნება საკონსტიტუციო შესწორება, ის თანამდებობას დატოვებს:
„ქართველოფობებმა ანუ ერთსქესიანი ქორწინების დაკანონების მომხრეებმა სრული კრახი განიცადეს. ესაა განმსაზღვრელი მიზეზი იმისა, რომ მათ ტაქტიკა შეცვალეს და თავისი ფარული მხარდამჭერების მეშვეობით ცდილობენ საკითხის გაუბრალოებას. წინასწარ გაფრთხილებთ, რომ უახლოეს დღეებში დაიწყება ახალი პიარკამპანია, რომ ერთსქესიანთა ქორწინების დაკანონება არარეალურია; არ ღირს კონსტიტუციაში შესწორების შეტანა (სადაც განისაზღვრება, რომ ოჯახი არის ქალისა და მამაკაცის ერთობა); რომ უპრიანია კონფორმისტული პოზიციის დაჭერა; რომ ამ საკითხით პოლიტიკოსები სპეკულირებენ, რომელთაც კარიერისტული მიზნები ამოძრავებთ და ასე შემდეგ. ისიც ზუსტად ვიცი, თუ რომელ პოლიტიკურ პარტიაში დამუშავდა ეს ახალი გეგმა. ამავე დროს ძლიერდება ე.წ. „კეთილისმსურველთა" რჩევები ჩემს მიმართ, რომ გავჩერდე, თორემ შესაძლოა ყველაფერი დავკარგო. სწორედ ამიტომ მინდა, სახალხოდ განვაცხადო: პოლიტიკურ -კარიერისტული მიზნები რომ არ მამოძრავებს, საშიშროება რომ რეალურია, სწორედ ამის დასამტკიცებლად, მე, როგორც მთავრობის ერთ-ერთი უმაღლესი თანამდებობის პირი, სასწორზე ვდებ ჩემს პოლიტიკურ კარიერას, თანამდებობას, ყველაფერს და საქვეყნოდ ვაცხადებ, რომ თუ მხარდაჭერილი არ იქნება საკონსტიტუციო შესწორება, რომლის მიხედვითაც გამოირიცხება ერთსქესიანთა ქორწინების დაკანონება, მაშინ მე ჩემს თავს ვერასოდეს ვხედავ იმ ხალხის გვერდით, რომლებიც ღიად თუ ფარულად მხარს უჭერენ ამ უზნეობის (თუნდაც ოდესმე) დაკანონებას! ესააა ჩემი პოზიცია და ის გადახედვას არ ექვემდებარება!" - აცხადებს ბრეგაძე.
