თურქეთის პრეზიდენტის რეჯეპ ტაიპ ერდოღანის განცხადებით, სანამ რუსეთი სირიის ტერიტორიაზე ავიადარტყმებს ახორციელებს, სამშვიდობო მოლაპარაკებებს აზრი არა აქვს.

მისი თქმით, „რუსეთი სირიაში მკვლელობებს განაგრძობს".

ამასთან, ერდოღანის მოსაზრებით, სირიის საკითხზე გამართული მოლაპარაკებების მონაწილეები შეთანხმებას ვერ მიაღწევენ.

დღეს ცნობილი გახდა, რომ ჟენევაში მიმდინარე მოლაპარაკებათა პროცესი 25 თებერვლამდე გადაიდო. რუსეთის საგარეო საქმეთა სამინისტრომ ამისთვის პასუხისმგებლობა საუდის არაბეთს დააკისრა, აშშ-ის სახელმწიფო დეპარტამენტმა კი მოსაზრება გამოთქვა, რომ მოლაპარაკებების გადადება სწორედ სირიაში რუსეთის ქმედებებით არის გამოწვეული.