საქართველოს პარლამენტის თავდაცვისა და უშიშროების კომიტეტის თავმჯდომარე რუსეთის და ყოფილი საბჭოთა კავშირის მკვლევარის დონალდ ჯენსენის მოსაზრებას, პანკისში რუსეთის შეჭრის საფრთხესთან დაკავშირებით, უსაფუძვლოს უწოდებს. როგორც სესიაშვილმა „რეპორტიორთან" საუბრისას განაცხადა, ეს მხოლოდ ანალიტიკოსის მოსაზრებაა და პანკისში რუსეთის შეჭრის საფრთხე რეალურად არ არსებობს.
„ასეთი ვარაუდები შეიძლება გამოთქვან ანალიტიკოსებმა, თუმცა, ამ ეტაპზე არ არის ნიშნები, რომ ჩვენ პირდაპირი საფრთხე დავინახოთ რუსეთის მხრიდან პანკისში რაიმე სახის ოპერაციის ჩატარებისა. ასეთი არც ინფორმაციაა, არც გადაადგილება შეინიშნება და არც სხვა დამატები მონაცემები გვაძლევს იმის საფუძველს, რომ ეს მოსაზრება დავადასტუროთ. ანალიტიკოსებს უყვართ ასეთი ხმამაღალი ვარაუდების გამოთქმა და ამ შემთხევვაში ეს მისი მოსაზრებაა და მივიღოთ ეს, როგორც ვარაუდი", - აცხადებს სესიაშვილი.
ჯონს ჰოპკინსის უნივერსიტეტის რუსეთის და ყოფილი საბჭოთა კავშირის მკვლევარი დონალდ ჯენსენი არ გამორიცხავს, რომ რუსეთი ტერორიზმის საბაბით პანკისში შეიჭრას. აღნიშნული მოსაზრება ჯენსენმა რუსეთის საგარეო საქმეთა მინისტრ სერგეი ლავროვის მიერ გაკეთებულ განცხადებასთან დაკავშირებით გამოთქვა, რომლის თანახმადაც, „ისლამური სახელმწიფო" მებრძოლებს პანკისში წვრთნის.
„ტერორიზმთან ბრძოლაში რუსეთი დასავლეთის მოკავშირეა, რაც მას გარკვეულ დაუსჯელობის სტატუსს ანიჭებს. თუ რუსეთი ამტკიცებს, რომ საქართველოში ტერორისტები არიან და ამას პანკისში შესასვლელად გამოიყენებს, მერე ყველას ეტყვის, რომ ეს ანტიტერორისტული ოპერაცია იყო. მეორე სახიფათო საკითხია კრემლის მიერ საქართველოს საშინაო საკითხებში ჩარევა, თითქოს კრემლს უფლება ჰქონდეს ეს გააკეთოს. საქართველო დამოუკიდებელი ქვეყანაა, რუსეთის საქმე არ არის საქართველოს ეროვნულ უსაფრთხოებაზე საუბარი თუ ამას საქართველო არ სთხოვს და საქართველოს ეს არ უთხოვია", - განაცხადა ჯენსენმა.
