პარლამენტის თავმჯდომარის მოადგილე გუბაზ სანიკიძე მიიჩნევბს, რომ რელიგიური გრძნობების შეურაცხყოფა დასჯადი უნდა იყოს, თუმცა კანონის მუხლში ცვლილების შეტანა ამ მხრივ ცოტა გართულდება, რადგან დეტალურად უნდა იყოს გაწერილი, თუ რა ჩაითვლება რელიგიური გრძნობების შეურაცხყოფად, რაც საკმაოდ დიდ სირთულეს წარმოადგენს.
ამის შესახებ სანიკიძემ გადაცემაში „პრიორიტეტი" განაცხადა და საზოგადოებას აღნიშნულ თემასთან დაკავშირებით თავის შეკავებისკენ კიდევ ერთხელ მოუწოდა.
„ყველას აქვს უფლება თავისი მოსაზრება გამოთქვას, მაგრამ არსებობს მოვალეობებიც. მოვალეობაა, რომ თუ განცხადების გაკეთება გინდა, საკითხზე მცირეოდენი წარმოდგენა მაინც უნდა გქონდეს.
რელიგიური გრძნობების შეურაცხყოფა დასჯადი უნდა იყოს, მაგრამ საერთო პოზიციის უკან კიდევ დგას თუ რა შეიძლება ჩაითვალოს რელიგიურ შეურაცხყოფად. ეს საკმაოდ რთულია, შეიძლება ჩაითვალოს ძალიან ბევრი რამ, ან არ ჩაითვალოს, გააჩნია კონტექსტი როგორ იქნება. უბრალოდ ვამბობ- ძვირფასო მეგობრებო, ალბათ ყველა ხედავს რა პროცესი მიდის. საქართველო არის რელიგიური თვალსაზრისით ერთ-ერთი ყველაზე სტაბილური ქვეყანა, შეიძლება ითქვას რეგიონში ნამდვილად, თუ მსოფლიოში არა. ყველას მოვუწოდებ, არ არის საჭირო ახლა ჭეშმარიტებების დადგენა, მით უმეტეს იმ ჭეშარიტებების, რაც არასდროს არ დადგინდება. ყველას მოვუწოდებ, რომ თავი შეიკავონ ასეთი საუბრებისგან, იმიტომ, რომ როდესაც არსებობს ერთი მხარე, არსებობს მეორე მხარეც. მოვუწოდებ ყველას, ჩვენ ჩვენს პოზიციებზე დავრჩეთ და თან თავი შევიკავოთ."- განაცხადა სანიკიძემ.
