„საქართველოსთვის უკეთესი იქნება აქცენტი, იმპლემენტაციაზე გაკეთდეს, რადგან MAP-ის მიღება ახლა ვერ მოხერხდება" - NATO-ს გენერალური მდივნის სპეციალური წარმომადგენლის ჯეიმს აპატურაის ამ  განცხადებას, საპარლამენტო უმრავლესობის წევრიგოგლა ჟვანია „რეპორტიორთან" საუბრისას ეხმაურება. ჟვანიას თქმით, საქართველოსთვისMAP  მიზანი არ უნდა გახდეს. უმრავლესობის წევრი მიიჩნევს, რომ NATO-სთან დაახლოებისთვის საქართველომ ნაბიჯები უნდა გადადგას, თუმცა გამომდინარე იქიდან, რომ საქართველო კონფლიქტურ სიტუაციაშია რუსეთთან, NATO საქართველოს პრობლემებს თავს აარიდებს.

„აპატურაის განცხადება იმ რეალობას ასახავს, რომელშიც ჩვენ ვიმყოფებით. ადამიანმა პირდაპირ გვითხრა, რომ  MAP-ის მიღება გამორიცხულიაო. MAP ნამდვილად არ უნდა გახდეს ჩვენი მიზანი. ბუნებრივია, ჩვენ უნდა გადავდგათ ნაბიჯები, რათა ჩვენი დაახლოება მოხდეს  NATO-სთან.  თუმცა, რეალურად, საქართველოს მომავალში NATO-ში გაწევრიანება  არ ელოდება, ეს ჩვენი რეალობაა. რეალობაა, გამომდინარე იქიდან, რომ NATO თავის რიგებში ვერანაირად ვერ მიიღებს ქვეყანას, რომელიც საკმაოდ კონფლიქტურ ვითარებაშია ჩართული რუსეთთან. საქართველოს ტერიტორია ჩვენი მეზობლის მიერ არის ოკუპირებული, ამ მეზობელთან დიპლომატიური ურთიერთობა არ გვაქვს, საკმაოდ რთული ვითარებაა. გარკვეული დათბობა ჩვენსა და რუსეთს შორის მოხდა, ყინული შედარებით გალღვა, თუმცა, შოკური მდგომარეობიდან გამოსული არ ვართ. ასეთ ვითარებაში, ბუნებრივია, ზედმეტია NATO-ში გაწევრიანებაზე საუბარი. NATO  ჩვენს პრობლემებს კისერზე არ აიკიდებს, NATO-მ  მიგვიღოს თავის რიგებში - ეს ნიშნავს, რომ აუტკივარი თავი აიტკიოს და ჩვენი პრობლემები აიკიდოს. ბუნებრივია, ეს  არ გამორიცხავს, რომ ჩვენ არ ვიმოძრაოთ ამ მიმართულებით, აქტიურად უნდა ვითანამშრომლოთ NATO-სთან.  

აპატურაიმ მკაფიოდ თქვა, რომ MAP - ეს არის ინსტრუმენტი და არა მიზანი. მიზნისკენ შეიძლება სხვა გზებითაც იარო. NATO-ს თემები, სამწუხაროდ, საქართველოს სინამდვილეში ძალინ ხშირად პოლიტიკური სპეკულაციების საგანია.  პოლიტიკური მიზნებისთვის, ქულების დაწერისა ან დისკრედიტაციისთვის  ამ თემების გამოყენება ხშირად ხდება. რეალურად ისე ვხედავ ამ საკითხს, როგორც ვისაუბრე, ვფიქრობ, ეს არის სინამდვილე" , - განაცხადა გოგლა ჟვანიამ.