„საპარტნიორო ფონდის" თავმჯდომარის დავით საგანელიძის განცხადებით დღეს საქართველოში მედიკამენტებზე ფასები ძალიან გაზრდილია, რაც მოსახლოებას ძლიერ აწუხებს. როგორც დავით საგანელიძემ გადაცემაში 2030 განაცხადა, მუშაობა ჯანდაცვის სამინისტროში ამ მხრივაც მიმდინარეობს. 

„მედიკამენტებზე ფასები არაადექვატურია, რაც საზოგადოებას ძალიან აწუხებს. ხელისუფლების პირველი დაპირება არსებული ფასების დაწევა იყო. ფასების დაწევის ორი მეთოდი არსებობს. ერთია ბიზნესზე ძალადობა, რომელსაც არასოდეს გამოვიყენებთ. მეორე - ღია კონკურენცია, რის შედეგადაც, მოსახლეობა ხარისხიან მედიკამენტებს იაფად მიიღებს. ძალიან კარგია, რომ ფარმაცევტული და ჰოსპიტალური სექტორის მიმართულებით, ჯანდაცვის რეფორმა წარმატებით ხორციელდება.

ფარმაცევტული ქარხნის მშენებლობა წელს, გაზაფხულზე დაიწყება. წარმოების დაწყებამდე 2 წელია. ქარხანამ, მინიმუმ, 900 პრეპარატი უნდა აწარმოოს. ეს არ იქნება ორიგინალი პრეპარატები, მაგრამ ხარისხის გარანტი იქნება სახელმწიფო კონტროლი. წარმოების დაწყებამდე, კომპანიამ პრეპარატების შემოტანის ვალდებულება აიღო, რითაც ამ პრეპარატებზე ფასი 30 %-ით გაიაფდებოდა. ქარხნის ამუშავების შემდეგ, ფასი ნახევარი იქნება. ჯერჯერობით, საუბარი 411 პრეპარატზეა." - განაცხადა დავით საგანელიძემ.