სოლიდარობის ფონდი საქართველოს სოლიდარობის ფონდის საქმიანობის შემაჯამებელ რიგით მე-10 პერიოდულ ანგარიშს აქვეყნებს:

„თქვენი მხარდაჭერით, საქართველოს სოლიდარობის ფონდში, დაფუძნებიდან 2016 წლის 31 იანვრის ჩათვლით საერთო ჯამში 2 704 339 ლარი იქნა მობილიზებული. უკვე მობილიზებული და პროგნოზული დონაციების გათვალისწინებით, ჩვენ უკვე დავამტკიცეთ სიმსივნით დაავადებული 215 ბავშვისა და 22 წლამდე ახალგაზრდის მკურნალობისა და დიაგნოსტიკის დაფინანსება 1 122 887 ლარის, 2 137 009 აშშ დოლარისა და 827 301 ევროს მოცულობით.

215 შემთხვევიდან 106 ბავშვისა და ახალგაზრდის ძვირადღირებული დიაგნოსტიკა და მკურნალობა დაფინანსდა როგორც საქართველოში ასევე საზღვარგარეთ - გერმანიის, ესპანეთის, თურქეთის, იაპონიის, ისრაელის, იტალიისა და საფრანგეთის კლინიკებში.

ჩვენი ერთ-ერთი ბენეფიციარი გახლავთ ბათუმელი 15 წლის გიორგი ფირცხალაიშვილი, რომლის მკურნალობისათვის თურქეთში საჭირო 65 000 აშშ დოლარიდან სოლიდარობის ფონდმა 58 000 აშშ დოლარის დაფინანსება დაამტკიცა. დღეისათვის გიორგის ჯანმრთელობის მდგომარეობა მნიშვნელოვნად არის გაუმჯობესებული და ჩვენ მოუთმენლად ველით ბავშვის მკურნალობის წარმატებით დასრულებას.

ჩვენ თქვენი დახმარებით არა მხოლოდ ბავშვების მკურნალობის დაფინანსება შევძელით, არამედ ათობით ოჯახი გადავარჩინეთ გაღარიბებას, რადგან მკურნალობის დაფინანსების ერთადერთი გზა ბევრი ოჯახისათვის საცხოვრებლის გაყიდვა იქნებოდა.

თქვენთან ერთად ჩვენ არაერთი სიცოცხლის ისტორია შევქმენით და თქვენი თანადგომით კიდევ მრავალ პატარას შევუნარჩუნებთ სიცოცხლეს.

უღრმეს მადლობას გიხდით ფონდის თითოეულ გულშემატკივარს, რომ გვაძლევთ ბავშვების სიცოცხლისათვის ბრძოლის საშუალებას. შემოგვიერთდით", - ნათქვამია ინფორმაციაში.