„ჩვენ ვართ აბიტურიენტები, რომლებიც უნდა გავმხდარიყავით კონსერვატორიის სტუდენტები", - აცხადებს ნინო მაჭავარიანი და „რეპორტიორის" პრესკლუბში ჰყვება, თუ რატომ ვერ მოხვდნენ ის და მისი მეგობარი რუსუდან კვალიაშვილი კონსერვატორიაში. მაჭავარიანის თქმით, ტექნიკური ხარვეზის გამო, რომელიც გამოცდების ეროვნულმა ცენტრმა დაუშვა, ის და რუსუდან კვალიაშვილი სტუდენტები ვერ გახდნენ.
„როდესაც რეგისტრაცია გავიარეთ, რაღაც შეცდომის გამო, აღმოჩნდა, რომ დაგვარეგისტრირეს სრულიად სხვა ფაკულტეტზე. ამის გამო შეგვექმნა პრობლემა და მიუხედავად იმისა, რომ ყველა გამოცდა ჩავაბარეთ, დავრჩით გარეთ.
დღეს, როდესაც სასამართლომ განაჩენი ჩვენ სასიკეთოდ გამოიტანა, „გამოცდების ეროვნულ ცენტრს" სასამართლო განჩინების აღსრულებაც არ სურს და აქეთ გვადანაშაულებენ, რომ მოსამართლე იყო მიკერძოებული. ეს სრული აბსურდია. არაფერს ვითხოვთ უკანონოს. გვინდა, დავიცვათ ჩვენი უფლებები და ამ საქმეს ბოლომდე მივიყვანთ", - განაცხადა ნინო მაჭავარიანმა.
აღნიშნულ ვითარებაზე საუბრობს აბიტურიენტების ადვოკატი ირმა მახათაძე და აცხადებს, რომ სასამართლომ გადაწყვეტილება აბიტურიენტების სასარგებლოდ გამოიტანა, თუმცა გამოცდების ეროვნული ცენტრი მინიჭებულ საჯარო უფლებამოსილებას კანონსაწინააღმდეგოდ იყენებს და სასამართლოს გადაწყვეტილება აღსრულებაში არ მოჰყავს.
„სასამართლომ მიიღო სწორი, ობიექტური და კანონიერი გადაწყვეტილება. შეფასებისა და ეროვნული გამოცდების ცენტრს დაევალა, რომ გამოსცეს ახალი ინდივიდუალური, ადმინისტრაციულ-სამართლებრივი აქტი რანჟირების დოკუმენტში ცვლილებების შეტანასთან დაკავშირებით.
დავა მიმდინარეობდა იმაზე, რომ გამოცდების ეროვნულმა ცენტრმა, რომელიც ადმინისტრაციული ორგანოა, მინიჭებული საჯარო უფლებამოსილება კანონსაწინააღმდეგოდ განახორციელა. ამიტომ ვითხოვდით ჩვენ რანჟირების დოკუმენტში ცვლილების შეტანას. სარჩელი იყო დასაბუთებული. სასამართლოც იყო მოწოდების სიმაღლეზე და ნამდილად განხორციელდა ეფექტური მართლმსაჯულება. გამოცდების ეროვნულმა ცენტრმა ვერ დაამტკიცა თავისი მოქმედების სისწორე და შესაბამისად დადგა ის შედეგი, რაც უნდა დამდგარიყო.
დღეს გამოცდების ეროვნული ცენტრი არ ახდენს სასამართლოს გადაწყვეტილების აღსრულებას. ისინი სისხლისსამართლებრივი პასუხისმგებლობის საკითხის დაყენებისკენ ისწრაფვიან თავისივე ნებით. ამ შემთხვევაში, ადგილი აქვს ადმინისტრაციული ორგანოს თვითნებობას. თუკი სასამართლოს გადაწყვეტილების დაუყოვნებელი აღსრულება არ მოხდება, რუსუდან კვალიაშვილი და ნინო მაჭავარიანი დაზარალდებიან. ისინი ვერ დაეწევიან საგანმანათლებლო პროგრამას და ვერ დააგროვებენ კრედიტებს. თუ ასე მოხდება, მათ წარმოეშვებათ ზიანის ანაზღაურების მოთხოვნის უფლება გამოცდების ეროვნული ცენტრის მიმართ.
გამოცდების ეროვნულ ცენტრს მოვუწოდებ, რომ მიიღოს ობიექტური გადაწყვეტილება", - განაცხადა ირმა მახათაძემ.
