ადვოკატის, მალხაზ ველიჯანაშვილის განცხადებით, სასჯელაღსრულების დეპარტამენტის ყოფილი ხელმძღვანელი დავით ჭაკუა  ავსტრიელ სამართალდამცველებს თავად ჩაბარდა . მისივე თქმით, ჭაკუას გადაწყვეტილი აქვს მართლმსაჯულების წინაშე წარსდგეს და  თავის უდანაშაულობა დაამტკიცოს.  ველიჯანაშვილი საქმეში არსებულ დარღვევებზე საუბრობს და ჭაკუას საქართველოში ექსტრადირების შესაძლებლობას გამორიცხავს.
ჭაკუას ბრალი დაუსწრებლად აქვს წაყენებული. ერთ-ერთი ბრალდება ციხის სკანდალურ კადრებს უკავშირდება, მეორე ბრალდება კი ციხის ბუნტთან არის დაკავშირებული. ჭაკუას ბრალად არაადამიანური მოპყრობის წაქეზება, ჩვენების მიცემის წაქეზება და სამსახურებრივი უფლებამოსილების გადამეტება ედება.
პროკურატურამ 24 ივლისს დავით ჭაკუას დაკავებასთან დაკავშირებით, განცხადება გაავრცელა.

"ქართული მხარის მიერ გამოცხადებული საერთაშორისო ძებნის საფუძველზე, 28 ივნისს, ავსტრიის სამართალდამცავებმა, დავით ჭაკუა საქართველოში მისი შემდგომი ექსტრადიციის მიზნით ქალაქ ვენაში დააკავეს. მოგვიანებით, ვენის სასამართლოს გადაწყვეტილებით, დავით ჭაკუას შეეფარდა გირაოს თანხის გადახდა 5000 ევროს ოდენობით. იმისთვის, რომ ხელი არ შეშლოდა საექსტრადიციო პროცედურების წარმოებას, სასამართლო გადაწყვეტილების საფუძველზე, დავით ჭაკუას დაეკისრა საექსტრადიციო პროცედურების განმხილველი ორგანოს წინაშე გამოცხადების ვალდებულება და აეკრძალა ავსტრიის ტერიტორიის დატოვება. ამავდროულად, ავსტრიის იუსტიციის ფედერალურმა სამინისტრომ გამოთქვა მზადყოფნა დავით ჭაკუას საქართველოში ექსტრადიციის საკითხის განხილვის თაობაზე", - აღნიშნულია პროკურატურის განცხადებაში.