ხელოვნებათმცოდნე და კინოდოკუმენტალისტი ოლიკო ჟღენტი წინააღმდეგია, სკოლებში საგანი „მე და საზოგადოება" ისწავლებოდეს. „რეპორტიორთან" საუბრისას ის ამბობს, რომ ე. წ. სასკოლო საგანი, რომელიც, თითქოსდა, უმცროსი ასაკის თაობაში სექსუალურ აღზრდას და ჰუმანიტარული იდეალების დაცვას გულისხმობს, სინამდვილეში, სრულიად სხვა მიზნებს ემსახურება.
„ე. წ. სასკოლო საგანი, რომელიც თითქოსდა უმცროსი ასაკის თაობაში სექსუალურ აღზრდას და ჰუმანიტარული იდეალების დაცვას გულისხმობს, სინამდვილეში, სრულიად სხვა მიზნებს ემსახურება: საერთაშორისო კვლევები ადასტურებს იმ საგანგაშო მონაცემებს, რაც ამგვარი „ჰუმანური მეთოდების" - სექსუალური განათლების დანერგვის შედეგად რიგ ქვეყნებში „იწვნიეს".
რატომ არ დაეკითხებიან ქართველი „მეთოდისტები" საერთაშორისო კვლევით ინსტიტუტებს, თუ რა შედეგი გამოიღო „უსაფრთხო, თავისუფალი სექსის" პროპაგანდამ ამერიკულ თუ ევროპულ სკოლებში?! შედეგები ხომ საგანგაშოა: პედოფილიის, ძალადობის, აგრესიის, ფსიქიკური აშლილობის კატასტროფული ზრდა მოზარდებში?!
რამდენადაც ვიცი, ადრე ქართულ სკოლებში ისწავლებოდა შემეცნებითად სასარგებლო საგანი: „რელიგია და კულტურა" - ეს არ იყო მხოლოდ მართლმადიდებლურ რელიგიაზე ორიენტირებული სწავლება, არამედ, ტრადიციული რელიგიების ზოგად კულტურულ კონტექსტში მოიაზრებოდა.
სამწუხაროდ, წინა ხელისუფლების განათლების მინისტრმა ეს საგანი ამოიღო სასკოლო სწავლებიდან - დღეს კი მის ჩანაცვლებას ყალბი და ფსევდო დისციპლინებით ცდილობენ, რომლის შემდგომი საფეხური აუცილებლად იქნება ერთნაირსქესიანთა ქორწინების და შვილის აყვანის დაკანონება. აღნიშნული კანონების მისაღებად უკვე ემზადება საბერძნეთი. მართლმადიდებელი ეკლესიის წმინდა მამები იმდენად შეაძრწუნა ამ საფრთხემ, რომ ამბიონიდან ამხილეს მთავრობა და პარლამენტი ქრისტეს სარწმუნოების ღალატზე, მოუწოდეს მათ, არ მიიღონ ეს კანონი", - ამბობს ოლიკო ჟღენტი.
