შშს მინისტრის მოადგილემ არჩილ თალაკვაძემ „2014 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ" საქართველოს სახალხო დამცველის რეკომენდაციების შესრულების შესახებ ანგარიში წარადგინა.
თალაკვაძის განცხადებით, სახალხო დამცველის ერთერთი რეკომენდაცია: დაკავებისას, პირის თავისუფლებისა და ხელშეუხებლობის უფლების მკაცრად დაცვისა და დაკავების შემთხვევის, საქართველოს კანონმდებლობის შესაბამისად დოკუმენტირებისათვის შესაბამისი ღონისძიებების განხორციელებას გულისხმობდა, უკვე განხილულია.
მინისტრის მოადგილემ აღნიშნა, რომ არსებული საკანონმდებლო ბაზას 2014 წლის 8 აგვისტოს მინისტრის ბრძანება დაემატა, რომლის თანახმად, დაკავებულ პირთა აღრიცხვის წიგნში, სხვა მონაცემებთან ერთად, ზედმიწევნით აისახება დაკავების ვითარება, ზუსტი დრო, მიზეზი, დამკავებელი და დაკავების საფუძველი, დაკავებული პირის სამმართველოში/განყოფილებაში შემოყვანის და გაყვანის ზუსტი დრო, ასევე, პირის დროებითი მოთავსების იზოლატორში/საპყრობილეში შესახლების თარიღი და საათი, თუ ეს გახდა აუცილებელი.
