18 თებერვალს „ერეკლე მეორის საზოგადოების“ ახალგაზრდული ფრთა საქართველოს პარლამენტთან აქციას გამართავს. როგორც „ერეკლე მეორის საზოგადოების“ თავმჯდომარე არჩილ ჭყოიძემ „რეპორტიორის“ პრესკლუბში გამართულ ბრიფინგზე განაცხადა, აქციის მთავარი მოთხოვნა, სახელმწიფო ბიუჯეტიდან პოლიტიკური პარტიების დაფინანსების შეწყვეტა იქნება.

„მომავალ ხუთშაბათს, 18 თებერვალს, პარლამენტის წინ გავმართავთ აქციას. ჩვენი მოთხოვნა იქნება, შეწყდეს სახელმწიფო ბიუჯეტიდან პოლიტიკური პარტიების დაფინანსება. გადავხედეთ ცესკო-ში პოლიტიკური პარტიების დაფინანსების ბიუჯეტს და ის 10 მლნ ლარს აღემატება. ეს არის ძალიან დიდი თანხა და მიგვაჩნია, რომ ქვეყანაში, სადაც ათიათასობით დევნილი გვყავს, გვყავს ძალიან ბევრი სოციალურად დაუცველი ადამიანი, არ უნდა ვუხდიდეთ კოლოსალურ თანხებს პარტიებს, რომელთა ნდობაც საზოგადოებაში 1-2 %-ს შეადგენს. ირღვევა კანონი „დისკრიმინაციის შესახებ“, მაშინ, როდესაც საქართველოს მოსახლეობას არ ეკითხებიან, უნდა თუ არა, მაგალითად ლეიბორისტულ პარტიას გადავუხადოთ 600 000 ლარზე მეტი წლიურად. გვინდა თუ არა, რომ ვაფინანსებთ თინა ხიდაშელს? გვინდა თუ არა, რომ „ნაციონალურ მოძრაობას“ ვუხდით 2 400 000 ლარს ყოველწილიურად?“ - განაცხადა ჭყოიძემ.