სასჯელაღსრულების, პრობაციისა და იურიდიული დახმარების საკითხა სამინისტრო, სასჯელაღსრულების #15 დაწესებულებაში მსჯავდებულთა მოთხოვნებს ეხმიანება და სპეციალურ განცხადებს ავრცელებს, რომელსაც „რეპორტიორი" უცვლელად გთავაზობთ.
„25 ივლისს, სასჯელაღსრულების #15 დაწესებულებაში 6-მა მსჯავრდებულმა შიმშილობა გამოაცხადა. ისინი მათი საქმეების გადახედვას ითხოვენ. სამ მათგანს სასჯელაღსრულების დეპარტამენტის თავმჯდომარესთან შეხვედრა სურს, ორი მსჯავრდებული კი პირობით ვადამდე გათავისუფლებას ითხოვს. სასჯელაღსრულების, პრობაციისა და იურიდიული დახმარების სამინისტრომ არაერთხელ განაცხადა, რომ საქმეების გადახედვა სამინისტროს კომპეტენციაში არ შედის და მსჯავრდებულებმა ოფიციალურად უნდა მიმართონ შესაბამის უწყებებს. რაც შეეხება იმ მსჯავრდებულებს, რომლებსაც პრეტენზიები პირობით ვადამდე გათავისუფლების კომისიასთან აქვთ, გვსურს გაგაცნოთ მათ მიერ ჩადენილი დანაშაულის ხასიათი და კომისიის გადაწყვეტილებები: ვარტკეს ა. - მსჯავრდებულია ნარკოტიკების შეძენისა და საზღვარზე გადმოტანისათვის. სასამართლოს გადაწყვეტილებით 19 წლით თავისუფლების აღკვეთა მიესაჯა. „ამნისტიის შესახებ" კანონით, სასჯელი შეუმცირდა 11 წლით და 6 თვით. მსჯავრდებულს ჯერ კიდევ არ ამოუწურვია სასჯელის ის ნაწილი, რის საფუძველზეც ადგილობრივი საბჭო განიხილავს მის შუამდგომლობას. სასჯელის ის ნაწილი, რომელიც პირობით ვადამდე გათავისუფლების საფუძველი შეიძლება გახდეს, ვარტკეს ა-ს 2015 წელს ეწურება. ჯამბულ ც. - მსჯავრდებულია ძარცვისთვის. (გაიტაცა სხვისი კუთვნილი ავტომანქანა) სასამართლო გადაწყვეტილებით მიესაჯა 6 წლით თავისუფლების აღკვეთა. „ამნისტიის შესახებ" კანონით, სასჯელის ვადა შეუმცირდა 1 წლით და 6 თვით. მიმდინარე წლის მარტში ადგილობრივმა საბჭომ განიხილა შუამდგომლობა მსჯავრდებულის პირობით ვადამდე გათავისუფლების შესახებ. უარი ეთქვა ვადამდე გათავისუფლებაზე, რადგან ჩადენილი აქვს ძალადობრივი დანაშაული, წარსულში ნასამართლევია ძარცვისა და ქურდობისთვის. მედიასაშუალებებით გავრცელდა სასჯელაღსრულების #15 დაწესებულების ერთ-ერთი მსჯავრდებულის, გივი კ-ს წერილი, სადაც ის მკურნალობის ჩატარებას მოითხოვს და აღნიშნავს, რომ ჯანმრთელობის გამოკვლევის შემდეგ, მკურნალობა არ ჩატარებია. მედიის მაღალი ინტერესიდან გამომდინარე, მოგაწოდოთ ინფორმაცია მსჯავრდებულისათვის ჩატარებული გამოკვლევებისა და მკურნალობის შესახებ: მიმდინარე წლის 14 აპრილს, მსჯავრდებულს ჩაუტარდა ყველა საჭირო გამოკვლევა და გაიარა ექიმის კონსულტაცია. გამოკვლევების შედეგებისა და ექიმის დასკვნის საფუძველზე დაენიშნა შესაბამისი მედიკამენტოზური მკურნალობა. სხვადასხვა სამკურნალო პრეპარატებთან ერთად, ის იღებს საჭირო ვიტამინებსაც. ამ ეტაპზე მსჯავრდებულ გივი კ-ს ჯანმრთელობის მდგომარეობა სტაბილურია. პაციენტი ამ დრომდე ექიმის მეთვალყურეობის ქვეშ იმყოფება."
