აზერბაიჯანი ევროკავშირს ასოცირების ნაცვლად, პარტნიორობის შესახებ შეთანხმების ხელმოწერას სთავაზობს. ამის შესახებ ქვეყნის პრეზიდენტის ადმინისტრაციის ხელმძღვანელის მოადგილე ნოვრუზ მამედოვმა განაცხადა. მანვე დასძინა, რომ რუსეთის მხრიდან ზეწოლა არ განხორციელებულა. ამის შესახებ რუსული მედია წერს.
„ჩვენ უკვე შევატყობინეთ ევროკავშირს, რომ ვერ შევძლებთ ევროკავშირის მიერ შემოთავაზებული ასოცირების ხელშეკრულების გაფორმებას. გვსურს, მოვამზადოთ დოკუმენტი, რომელიც უფრო ადექვატურად პასუხობს ჩვენი ურთიერთობებისა და თანამშრომლობის დონეს", - აღნიშნა მამედოვმა.
მისი თქმით, ოფიციალურმა ბაქომ ევროკავშირს შესთავაზა, მიღწეული თანამშრომლობის დონის გათვალისწინებით, ხელი მოეწეროს პარტნიორობის შესახებ შეთანხმებას.
„სპეციალისტებმა, რომლებიც უშუალოდ არიან დაკავებულები ჩვენი ურთიერთობებით ევროკავშირთან, იციან, რომ აზერბაიჯანმა ეს პოზიცია ჯერ კიდევ ერთი წლის წინ გამოთქვა, ანუ ეს სიახლე არ არის ჩვენსა და ევროკავშირის ურთიერთობებს შორის", - განაცხადა მამედოვმა ტელეკომპანია ANS-თან ინტერვიუში.
