დღეს, 13:00 საათზე, გიორგი სანაიას ოჯახი მთავარ პროკურატურას საქმის გამოძიებასთან დაკავშირებით განცხადებით მიმართავს. განცხადება  საბურთალოს სასაფლაოზე გაკეთდება.

ჟურნალისტ გიორგი სანაიას მკვლელობიდან დღეს 12 წელი გავიდა. 2001 წლის 26 ივლისს გიორგი საკუთარ სახლში მოკლეს. მას ჭრილობა თავის არეში ცეცხლსასროლი იარაღით  ჰქონდა მიყენებული. გიორგი სანაიას მკვლელობაში ბრალდებულ, გრიგოლ ხურცილავას იგივე „გრიცსკოს" 2003 წლის 9 ივლისს, გლდანი-ნაძალადევის რაიონულმა სასამართლომ 13 წლის ვადით თავისუფლების აღკვეთა მიუსაჯა. თუმცა, მსჯავრდებულმა საპატიმრო გასული წლის დეკემბერში ამინისტიით დატოვა.

გიორგი სანაიას მკვლელობის საქმესთან დაკავშირებით საზოგადოებაში დღემდე ბევრი კითხვის ნიშანი არსებობს. დღემდე არსებობს ეჭვი, რომ გიორგი სანაია  ხურცილავას არ მოუკლავს. გიორგის ოჯახისთვის, მეგობრებისთვის და ზოგადად საზოგადოებისთვის დღემდე უცნობია, რა მოხდა სიანმდვილეში 2001 წლის 26 ივლის, გიორგი სანაიას მკვლელობის ღამეს.