განათლებისა და მეცნიერების მინისტრის ყოფილი მოადგილე, დავით ზურაბიშვილი ახალი მინისტრის გადაწყვეტილებას ეხმიანება. მისი განცხადებით, არ აპირებს მიიღოს ახალი განათლების მინისტრის შეთავაზება იმის თაობაზე, რომ მან მინისტრის მოადგილის თანამდებობის ნაცვლად, დაიკავოს მინისტრის მრჩევლის პოზიცია. დღევანდელი ფაქტის შემდეგ ზურაბიშვილი აღმასრულებელ ხელისუფლებაში მის საქმიანობას გამორიცხავს და აპირებს, ძირითადად, პარტიული საქმიანობით დაკავდეს. „იყო საუბრები მინისტრთან, განიხილებოდა ვარიანტები, მაგრამ აღნიშული გადაწყვეტილების შესახებ მედიით გავიგე. თურმე ჟურნალისტებისთვის უთქვამს ქალბატონ თამარს ეს ამბავი. ისე სჯობდა ჩემთვის ეთქვა ჯერ და შემდეგ ჟურნალისტებისთვის. რომ ვთქვა, რომ ძალიან აღფრთოვანებული ვარ ამ ამბით, მოგატყუებთ. ვთვლი, რომ ცუდად არ ვმუშაობდი და საკმაოდ კომპეტენტური ვარ იმ სფეროში, სადაც ვმუშაობდი. მრჩევლის სტატუსის მონიჭება დაცინვას ჰგავს. რა მრჩეველი, რის მრჩეველი?! შანსი არაა, რომ დავთანხმდე“,-აცხადებს დავით ზურაბიშვილი.