ფინანსთა მინისტრი ნოდარ ხადური მიიჩნევს, რომ ეკონომიკაში აშკარა გამოცოცხლება შეიმჩნევა. ამის შესახებ ნოდარ ხადურმა, დღეს, ეკონომიკური ზრდის დაგეგმილ პროგნოზზე სხვადასხვა პროცესების გავლენაზე საუბრისას განაცხადა.
„პირველ რიგში, რაც ძალიან მნიშვნელოვანია, არის ის, რომ მაისიდან არის გამოცოცხლების ნიშნები და ოქტომბერსა და ნოემბერში სერიოზული გამოცოცხლებაა. 6%-იანი ეკონომიკური ზრდა ვერ იქნება მიღწეული, მაგრამ წინასწარი მონაცმებით, ოქტომბერში დამატებული ღირებულების გადასახადის გადამხდელი საწარმოების ბრუნვა 3.5%-ით გაიზარდა და ჩვენ ვფიქრობთ, რომ ნოემბერში დაახლოებით, 10-12%-ით არის გაზრდილი, უბრალოდ, ჯერ ნოემბრის მონაცემები სრულად დათვლილი არ არის. ეს იმას ნიშნავს, რომ ეკონომიკაში გამოცოცხლება აშკარად შეიმჩნევა. ეს ქალაქშიც შესამჩნევია, მშენებლობები მომრავლდა", - განაცხადა ნოდარ ხადურმა.
მინისტრი ასევე მიიჩნევს, რომ როცა მთავრობამ 2013 წელს ეკონომიკური ზრდის პროგნოზი 6%-ით განსაზღვრა, შეცდომა არ დაუშვია და სწორი პროგნოზი იყო გაკეთებული.
„ბიუჯეტის ძირითადი პარამეტრები საქართველოს პარლამენტს ვანო მერაბიშვილის მთავრობამ წარუდგინა, შესაბამისად, გაკეთებული მაკროეკონომიკური პროგნოზები იყო ის აპრიორი, რომელზეც ბიუჯეტი დაიგეგმა. ჩვენ ავდექით და ამ პრიორიტეტების ქვეშ ზოგიერთი ხარჯი, რომელიც არასწორად მივიჩნიეთ, ვალდებულებების შესასრულებლად გადავიტანთ და მიმდინარე წლის განმავლობაში პრაქტიკულად, ყველა ვალდებულება შევასრულეთ. ასე, რომ, მაკროეკონომიკურ პროგნოზში შეცდომა არ ყოფილა და ეს პროგნოზი ძალიან ბევრ ფაქტორზე იყო დამოკიდებული, მათ შორის პოლიტიკურზეც", - განაცხადა ხადურმა.
ნოდარ ხადური მიმდინარე წლის ბოლომდე 2.5-3%-იან ეკონომიკურ ზრდას პროგნოზიორებს.
