რადაში აზაროვის უნდობლობის საკითხის ჩავარდნის შემდეგ, ოპოზიციის ლიდერებმა მომიტინგეებს ბანკოვის ბულვარზე პრეზიდენტის ადმინისტრაციასთან გადანაცვლებისაკენ მოუწოდეს. მომიტინგეები ახლა უკვე პრეზიდენტისგან ითხოვენ აზაროვის მთავრობის გადაყენებას. ოპოზიციის ლიდერთა განცხადებით, რეგიონების პარტიამ და კომუნისტებმა კიევის ქუჩებში სისხლისღვრა საკუთარ თავზე აიღეს და პასუხისმგებლობაც მათ ეკისრებათ. უცნობია, როგორ განვითარდება მოვლენები პრეზიდენტის სასახლესთან, რომელთანაც მისასვლელი გზები, სპეცდანიშნულების რაზმებს გადაკეტილი აქვთ.
სწორედ, აღნიშნულ ქუჩაზე მოხდა სისხლიანი შეტაკება ერთი დღის წინ, რომლის დროსაც რამდენიმე ათეული მოქალაქე და ჟურნალისტი დაშავდა. ოპოზიცია პრეზიდენტის ადმინისტრაციის ბლოკირებას გეგმავს, თუმცა, თავად იანუკოვიჩი ჩინეთში იმყოფება. ის სამშობლოში ხვალ დაბრუნდება.
ასევე, ვრცელდება ინფორმაცია, რომ ღამით ლვოვიდან დედაქალაქისკენ, საპროტესტო აქციებში მონაწილეობის მისაღებად, მომიტინგეების 133 ავტობუსის კოლონა გაემართება. ამის შესახებ ლვოვის ქალაქის საბჭოს პორტალი იტყობინება.
