ბათუმის იუსტიციის სახლში საქართველოს იუსტიციის სამინისტროს, ადვოკატთა ასოციაციისა და საფრანგეთის ადვოკატთა ეროვნული საბჭოს ერთობლივი ინიციატივით კონფერენცია გაიმართა. 
იუსტიციის სამინისტროს ცნობით, ღონისძიების მთავარი მიზანი ადამიანის საკუთრების უფლების, პერსონალური მონაცემების დაცვისა და მოქალაქეთა სერვისების თემასთან დაკავშირებული საკითხების განხილვა იყო. 
შეხვედრა იუსტიციის მინისტრის პირველმა მოადგილემ, დავით ჯანდიერმა და საფრანგეთის ადვოკატთა ეროვნული საბჭოს, ევროპისა და საერთაშორისო საქმეების კომისიის პრეზიდენტმა, ბერტრან დებოსკიმ გახსნეს.
კონფერენციაზე საქართველოს ადვოკატთა ასოციაციის პრეზიდენტი, ზაზა ხატიაშვილი,საქართველოს საკონსტიტუციო სასამართლოს თავმჯდომარის მოადგილე, ზაზა თავაძე და ადვოკატთა ეროვნული საბჭოს წევრი, ვალ დუაზის ადვოკატი, ფლორანს ლეგრანი მოხსენებით წარდგნენ.  
"ეს ძალიან კარგი საშუალებაა იმისთვის, რომ ქართველ და ფრანგ კოლეგებს შორის პირადი და საქმიანი ურთიერთობები დამყარდეს. საქართველოს აღებული აქვს განვითარების ევროპული კურსი და, ამავე დროს, საქართველო არის ევროსაბჭოს წევრი ქვეყანა. ამდენად, ადამიანის უფლებების სფეროში ისეთი დიდი გამოცდილების მქონე ქვეყნის ტრადიციების გაზიარება, როგორიც საფრანგეთია, ქართველი ადვოკატებისათვის ძალიან მნიშვნელოვანია", - აღნიშნა დავით ჯანდიერმა. 
იუსტიციის მინისტრის პირველი მოადგილის განცხადებით, საფრანგეთის ადვოკატთა სკოლის გამოცდილების გაცნობა ქართველი ადვოკატებისათვის მნიშვნელოვანია. 
აღსანიშნავია, რომ ხვალ, 27 ივლისს, ადვოკატის როლის შესრულების საბაზისო პრინციპები, ადვოკატის სტატუსის მოსაპოვებლად არსებულ მოთხოვნებსა და საპროცესო შეთანხმების ინსტიტუტთან დაკავშირებული საკითხები განიხილება. კონფერენციაზე სიტყვით  იუსტიციის მინისტრის მოადგილე, ალექსანდრე ბარამიძე წარდგება. 
შეხვედრის შემდეგ განხილულ საკითხებზე დისკუსია გაიმართება. კონფერენციას საქართველოს იუსტიციის მინისტრის პირველი მოადგილე დავით ჯანდიერი, საქართველოს ადვოკატთა ასოციაციის პრეზიდენტი ზაზა ხატიაშვილი და საფრანგეთის ადვოკატთა ეროვნული საბჭოს ევროპისა და საერთაშორისო საქმეების კომისიის პრეზიდენტი ბერტრან დებოსკი დახურავენ. 
კონფერენციას 35-მდე ადგილობრივი ადვოკატი დაესწრება.