ასობით დემონსტრანტმა კიევში, მინისტრთა კაბინეტის შენობის ბლოკირება დღეს დილიდან განაახლა. „რია ნოვოსტის" ინფორმაციით, აქციის მონაწილეების მთავარი მოთხოვნაა გადადგეს პრემიერი ნიკოლაი აზაროვი და მისი მინისტრთა კაბინეტი.

მომიტინგეებს მთავრობის სახლის ცენტრალური შესასვლელი აქვთ ბლოკირებული. შენობის დანარჩენ შესასვლელებთან სამართალდამცავები არიან მობილიზებული და ისინი მთავრობის სახლში თანამშრომლების შესვლას უზრუნველყოფენ.

უკრაინის მილიციის ავტობუსებმა უმაღლესი რადას შენობასთან მისასვლელი გზები სრულად გადაკეტეს. მიუხედავად ამისა, რადას შენობასთანაც რამდენიმე ასეული ადამიანია მობილიზებული.

რაც შეეხება პრეზიდენტის სასახლეს, შენობასთან აქციის მონაწილეების მცირე რაოდენობა იმყოფება.