პრემიერ-მინისტრთან არსებული ეკონომიკური საბჭოს მიერ მიღებული გადაწყვეტილების თანახმად, თბილისის შემოვლითი რკინიგზის მშენებლობის კონტრაქტორს ხელშეკრულება გაუგრძელდება.
მიღწეულია მოლაპარაკება მშენებელ კომპანიასთან ხელშეკრულების გაგრძელების შემდგომ პირობებსა და ვადებზე. აღნიშნული პროექტის განხორციელება სპონტანურად, ტექნიკურ ეკონომიკური დასაბუთების გარეშე დაიწყო.
ს/ს "საქართველოს რკინიგზამ" საკონსულტაციო კომპანიის MC Mobility-ის მეშვეობით პროექტის ამ ფორმით განხორციელების შემთხვევაში მოსალოდნელი შედეგები შეისწავლა. დადგინდა, რომ როგორც საოპერაციო ასევე მონაკვეთის მოვლა-შენახვის მაჩვენებლები უარესდება, გამტარუნარიანობა (სატრანზიტო სიმძლავრე) მცირდება. ამასთან, პროექტის ასეთი ფორმით განხორციელება მაღალბიუჯეტიანი თანმდევი პროექტების განხორციელების აუცილებლობას იწვევს, რაც არსებული პროექტის ბიუჯეტში გათვალისწინებული არ არის. კონტრაქტორის (ჩინეთის რკინიგზის 23-ე ბიურო) მიერ ვერ იქნა დაცული მშენებლობის შესრულების ვადები, შედეგად სამუშაოების დამთავრების თარიღისთვის (2013 წლის 8 ივნისი) კონტრაქტორს 18 თვიანი ჩამორჩენა ჰქონდა.
აქედან გამომდინარე, ეკონომიკურმა საბჭომ მიიჩნია, რომ აუცილებლობას წარმოადგენს შემოვლითი რკინიგზის ტექნიკურ-ეკონომიკური მაჩვენებლების გაუმჯობესება და მოსალოდნელი ნეგატიური შედეგების მინიმალიზაცია, რისთვისაც უნდა ჩატარდეს დამატებითი საპროექტო საინჟინრო კვლევები. უახლოეს მთავრობის სხდომა იმსჯელებს ხელშეკრულების ვადის 3 წლით გაგრძელების შესახებ.
