„თბილისის შემოვლითი რკინიგზის პროექტის დამუშავება 2016 წლამდე გაგრძელდება", - ამის შესახებ საქართველოს ეკონომიკის მინისტრმა გიორგი კვირიკაშვილმა მთავრობის დღევანდელი სხდომის შემდეგ განაცხადა.
მინისტრის ინფორმაციით, კონტრაქტორთან შეთანხმების საფუძველზე, პროექტი გადამუშავდება იმ სახით, რა სახითაც მისი ეკონომიკური მაჩვენებლები იქნება გაცილებით მისაღები რკინიგზის კომპანიისთვისაც.
„ასევე აქ არის სხვა, მათ შორის ეკოლოგიური საკითხები. თავის დროზე პროექტის შეჩერება გადაწყდა, რადგან არის შესაძლებლობა, მივიღოთ პროექტის ის მოდიფიკაცია, რომელსაც რკინიგზის გამტარუნარიანობასა და დანახარჯებზე არ ექნება ისეთი ზეგავლენა, როგორიც ჰქონდა არსებულს", - განაცხადა კვირიკაშვილმა.
ეკონომიკის მინისტრის ინფორმაციით, რა დაუჯდება საქართველოს მთავრობას პროექტის მოდიფიცირება, ამის დათვლა ახლა მიმდინარეობს.
თბილისის შემოვლითი რკინიგზის მშენებლობის კონტრაქტორს ხელშეკრულება გაუგრძელდება. ამის შესახებ გადაწყვეტილება საქართველოს პრემიერ-მინისტრთან არსებულმა ეკონომიკურმა საბჭოს მიიღო.
