სასჯელაღსრულების, პრობაციისა და იურიდიული დახმარების მინისტრის მოადგილე არჩილ თალაკვაძე ადვოკატ, თინათინ ნაკაშიძის მიერ გავრცელებულ განცხადებას გამოეხმაურა, რომლის თანახმადაც, დაწესებულებებში პატიმრები შიმშილობენ და მზადდება ბუნტი, რომლის მიზეზიც საპატიმროებში არსებული მძიმე ვითარებაა. ადვოკატის თქმით, განსაკუთრებით მძიმეა სამედიცინო კუთხით არსებული პრობლემები.
არჩილ თალაკვაძე აცხადებს, რომ სამედიცინო სამსახურმა დაუყოვნებლივ გადაამოწმა აღნიშნული ინფორმაცია და მოშიმშილეთაგან მხოლოდ ხუთ ადამიანს აღმოაჩნდა ჯანმრთელობის პრობლემები.
„ხუთივე პაციენტზე დახარჯულია სამედიცინო და ადმინისტრაციული პერსონალის დიდი დრო და 23 000 ლარზე მეტი. მივმართავ ყველა ადვოკატს, სამედიცინო საკითხებთან დაკავშირებით, ჩვენი პოზიცია არის გახსნილი და ნებისმიერს შეუძლია მოგვმართოს, და ერთად განვიხილოთ, თითოეული შემთხვევა, რომელზეც შეკითხვები არსებობს. ხაზგასმით მინდა ვთქვა, რომ ჯანმრთელობის საკითხებით ვაჭრობას არ დავუშვებთ და ცალკეული პირების მხრიდან დაუსაბუთებელი ბრალდებებით სასჯელაღსრულების ჯანდაცვის რეფორმა ვერ დაჩქარდება."-განაცხადა არჩილ თალაკვაძემ
თალაკვაძის ინფორმაციით, სისტემაში ძალადობა აღიკვეთა, კვების სტანდარტი შეიცვალა, ინფრასტრუქტურა გაუმჯობესდა და C ჰეპატიტის პროგრამა იწყება. მისივე თქმით, ვადამდე გათავისუფლების მექანიზმი მაღალი ტემპებით მუშაობს. რაც შეეხება კონკრეტულ ხუთ პაციენტს, ერთ-ერთ პაციენტს ჩატარებული აქვს ძვირადღირებული ოპერაციული მკურნალობა სამოქალაქო საავადმყოფოში, რასაც წინ ძვირადღირებული გამოკვლევები უძღვოდა.მეორეს ქალაქის კლინიკურ საავადმყოფოში გაუკეთა ძვირფადღირებული ოპერაცია ხერხემალზე და ახლა ის ექსპერტიზის ჩატარებას ითხოვს, რადგან მიაჩნია რომ ჩატარებული კომპიუტერელი ტომოგრაფიული და მაგნიტო-რეზონანსული გამოკვლევა გაყალბებულია. მესამე პაციენტი მხრის არეში მოძრაობის შეზღუდვას უჩივის, ასევე ჩატარებული აქვს ნევროპათოლოგის კონსულტაცია, რადიოლოგიური კვლევა და მკურნალობა. მეოთხე პაციენტი კი სამედიცინო ექსპერტიზის ჩატარებას ითხოვს.
სასჯელაღსრულების, პრობაციისა და იურიდიული დახმარების მინისტრის მოადგილის თქმით, აღნიშნული პაციენტები უყურადღებოდ არ დარჩენილან და მათზე დიდი რესურსია დახარჯული.
