აჭარის მაღალმთიანეთში, გზების გასაწმენდად, დამატებითი ტექნიკა იქნება მობილიზებული, - ამის შესახებ აჭარის მთავრობის თავმჯდომარე არჩილ ხაბაძემ საგანგებოდ გამართულ მთავრობის სხდომაზე განაცხადა.
მთავრობის თავმჯდომარის თქმით, მუნიციპალიტეტის თემებამდე მისასვლელი შიდა სასოფლო გზების თოვლისგან გასაწმენდად მობილიზებული ტექნიკა საკმარისი არ არის. აჭარის მთავრობა სარეზერვო ფონდიდან თანხებს გამოყოფს და გზების გასაწმენდად კერძო მფლობელებისგან დამატებით ტექნიკას დაიქირავებს.
"გამგებლებს მივეცი დავალება, რომ მუნიციპალიტეტებმა დაიქირაონ კერძო ტექნიკა და სწრაფად მოხდეს გზების გაწმენდა. სოფლების 50% გაწმენდილია. ამ დღეებში ძირითადი პრიორიტეტი იყო ავადმყოფების რაიონულ ცენტრებამდე გადაყვანა", - აღნიშნა არჩილ ხაბაძემ.
აჭარის ჯანდაცვის მინისტრმა ნუგზარ სურმანიძემ დაადასტურა,რომ, ბოლო დღეების განმავლობაში საგანგებო სამსახურის თანამშრომლებმა რამდენიმე ათეული პაციენტი გადაიყვანეს საავადმყოფოებში. მინისტრის თქმით, დიდთოვლობის გამო მაღალმთიანი აჭარის ერთ-ერთი სოფლიდან მშობიარე ქალის გადაყვანა საავადმყოფოში ვერ მოხერხდა. ნუგზარ სურმანიძემ განმარტა, რომ სახლის პირობებში მშობიარობამ დამაკმაყოფილებლად ჩაიარა.
"საავადმყოფოებს აქვთ ელექტროენერგია და გათბობა. პრობლემაა სოფლებიდან საავადმყოფომდე მიღწევა. ერთ-ერთი გამოძახების დროს, დიდთოვლობის გამო სამაშველო ბრიგადამ და მედპერსონალმა ვერ მიუსწრო მშობიარობას. ქალბატონმა სახლის პირობებში იმშობიარა, ახალშობილის და დედის ჯანმრთელობის მდგომარეობა დამაკმაყოფილებელია", - აღნიშნა ნუგზარ სურმანიძემ.
აჭარის მაღალმთიანეთს მეშვიდე დღეა ელექტროენერგია არ მიეწოდება. აჭარის მთავრობის თავმჯდომარის თქმით, დაზიანებული გადამცემი ხაზების აღდგენასა და მაღალმთიანეთისთვის ელექტროენერგიის სრულად მიწოდებას დაახლოებით ოთხი დღე დასჭირდება. თოვლის საფარი ხულოს მუნიციპალიტეტის სოფლებში ორ მეტრს აჭარბებს.
