ციტრუსის მოსავლის აღებისა და გადამუშავების პროცესს სოფლის მეურნეობის მინისტრი შალვა ფიფია ადგილზე ეცნობა.  გადამამუშავებელი საწარმოების მონახულება მან გურიის რეგიონიდან დაიწყო.

მინისტრმა შალვა ფიფიამ, მინისტრის მოადგილემ დავით ნატროშვილმა და აჭარის სოფლის მეურნეობის მინისტრმა ზაურ ფუტკარაძემ  ოზურგეთის მუნიციპალიტეტის სოფელ ნატანებში მდებარე ციტრუსისა და ხილის გადამამუშავებელისაამქრო დაათვალიერეს  და მანდარინის ჩაბარების პროცესს ადგილზე გაეცნენ.

აღნიშნული საამქრო შპს ,,სუბტროპიკული ხილის კომპანიამ" სოფლის მეურნეობის სამინისტროს „შეღავათიანი აგრიკრედიტის პროექტის" საშუალებით შექმნა. კომპანიამ  პროექტის ფარგლებში 420 000 აშშ დოლარის კრედიტი აიღო და თანამედროვე ტექნოლოგიებით აღჭურვილი ახალი საწარმო  ააშენა. ამ ეტაპზე საწარმო დღიურად 50 ტონა მანდარინს გადაამუშავებს, თუმცა დაგეგმილია წარმოების 100 ტონამდე გაზრდა. საწარმო აღჭურვილია სამაცივრე დანადგარებით. ციტრუსისა და ხილის გადამამუშავებელ საამქროში 50 ადგილობრივია დასაქმებული.

„აღნიშნული საწარმო  თანამედროვე მანქანა-დანადგარებით არის აღჭურვილი. გარდა ამისა, საამქროში მანდარინის პარაფინირების პროცესი ევროსტანდარტების დაცვით ხორციელდება. აღნიშნული ტექნოლიგიით ნაყოფის დამუშავება, საშუალებას იძლევა საექსპორტოდ გამზადებული ციტრუსის   ვარგისიანობა უფრო დიდხანს - დაახლოებით 2 თვესშენარჩუნდეს", - განაცხადა სოფლის მეურნეობის მინისტრმა.

ციტრუსის სეზონიის განმავლობაში, ნატანების ხილისა და ციტრუსის საამქრო 1500 ტონა მანდარინის გადამუშავებას გეგმავს.

დღესვე, სოფლის მეურნეობის მინისტრმა  ქობულეთის ციტრუსის გადამამუშავებელ საწარმოც მოინახულა. ქარხანა სრული დატვირთვით მუშაობს და სავარაუდოდ, წელს  დაგეგმილზე 2-ჯერ მეტი მანდარინის გადამუშავებას შეძლებს. საწარმო ძირითადად არასტანდარტული მანდარინის გადამუშავებაზეა ორიენტირებული.  ქარხანაში 250 ადგილობრივია დასაქმებული.

დღესვე,  19:00 სთ-ზე შალვა ფიფია, აჭარის მთავრობის მეთაურთან არჩილ ხაბაძესთან და აჭარის სოფლის მეურნეობის მინისტრთან ზაურ ფუტკარაძესთან ერთად  მედიის წარმომადგენლებს შეხვდება.