გასაუბრება პირველი შთაბეჭდილებაა, რომელსაც პოტენციურ დამქირავებელზე ახდენ, შესაბამისად, ეს თქვენი ურთიერთობის საწყისი და ერთ-ერთი ყველაზე მნიშნელოვანი ეტაპია. გავრცელებული მოსაზრების მიხედვით, გამსაუბრებელს კანდიდატზე შეხედულება უყალიბდება შეხვედრის პირველი რამდენიმე წუთის განმავლობაში, ამიტომ რაც უნდა გააკეთო შემდგომ, ვერ შეცვლი მის წინასწარ შექმნილ განწყობას შენ მიმართ. მიუხედავად იმისა, რომ ყველამ ვიცით გასაუბრებაზე ქცევის მიღებული წესები, მაინც არსებობს რამდენიმე წვრილმანი შეცდომა, რომელსაც ხშირად ვუშვებთ. ეს შეცდომები შენი კომპეტენციების არასწორ აღქმას იწვევს პოტენციურ დამსაქმებელში, ამიტომ თუ მათ შენც დაუშვებ, შეგიძლია არ გქონდეს შთაბეჭდილების პოზიტიურისკენ შეცვლის იმედი.

დროის მენეჯმენტი

ნუ დააგვიანებ. არ აქვს მნიშვნელობა „საცობში გაიჭედე“, „მანქანა შუა გზაზე გაგიფუჭდა“, „ძალიან რთულად მისაგნები ოფისია“, თუ რაღაც სხვა შეგემთხვა. არ უნდა დააგვიანო. დიახ, იმ 5 წუთითაც კი, რომელიც თითქოს მხოლოდ 5 წუთია. დამქირავებელს მსგავსი მიზეზები ძალიან ბევრჯერ მოუსმენია და უმეტეს შემთხვევაში, ეს მათთვის სრულიად მიუღებელია. თუ შენ ხშირად აგვიანებ ღონისძიებებზე და შეხვედრებზე თუნდაც მეგობრებთან, ან გიჭირს ქალაქში ორიენტაცია, წინასწარ განსაზღვრე მარშრუტი, ზუსტად დაადგინე სად მდებარეობს ოფისი და ადრე გადი სახლიდან, რომ მშვიდად მიაღწიო დანიშნულების ადგილამდე. შენ წარმოიდგინე, არც ზედმეტად ადრე მისვლა ითვლება კარგ ტონად – ეს იმას ნიშნავს, რომ იმდენად შეუჩვეველი ხარ რეჟიმს, დროს სწორად ვერ განსაზღვრავ და დათქმულამდე ნახევარი საათით ადრე მიდიხარ შეხვედრის ადგილას მაშინ, როცა ჯერ არავინ გელოდება.

წვრილმანი დეტალები

მოულოდნელმა ზარმა ან შეტყობინებამ შეიძლება საგრძნობლად შეამციროს შენი შანსები ინტერვიუზე. დამქირავებელი არასოდეს გაგაფრთხილებს გამორთო მობილური ტელეფონი, როგორც ეს კინოსეანსის დაწყების წინ ხდება, ამიტომაც გაითვალისწინე ეს. სხვაგვარად, ამ მცირე უხერხულობამ დამქირავებელი შეიძლება ნეგატიურად განაწყოს შენ მიმართ.

თავისუფალი ჩაცმულობა

რაც უნდა თავისუფალი იყოს ჩაცმის სტილი ოფისში, ინტერვიუზე ჯინსით გამოცხადებისას, აუცილებლად დემონსტრაციულად დაგათვალიერებენ. დამქირავებელთა უმეტესობის მოლოდინი არის ფორმალური ჩაცმის სტილი. არ შეცდებით, თუ უბრალო ქვედაბოლოს და პიჯაკს აარჩევთ. თითქოს პროფესიონალურ სამყაროში ჩაცმის სტილს დიდი მნიშვნელობა უკვე აღარ უნდა ენიჭებოდეს, თუმცა ეს ასე არ არის. დიახ, მნიშვნელოვანია რა გაცვიათ, რადგან ეს მეტყველებს იმაზე, თუ რამდენად სერიოზულად უდგებით პოტენციურ სამუშაოს.

დამქირავებელთა 95% თვლის, რომ გამომწვევად, თუნდაც სექსუალურად ჩაცმა გასაუბრებისთვის დიდი მინუსია. 15 სანტიმეტრიანი ქუსლები, მომდგარი მოკლე ქვედაბოლო და ღრმა დეკოლტე სხვა, შესაბამისი შეხვედრისთვის შეინახეთ, გასაუბრებისთვის კი ზომიერად კონსერვატიული სტილი შეარჩიეთ.

ფამილარული დამოკიდებულება

მომავალ ხელმძღვანელთან პოზიტიური კავშირის დამყარება ინტერვიუს დროს მნიშვნელოვანია, მაგრამ ეს არ ნიშნავს იმას, რომ სრულად გაიხსნათ და მოიქცეთ ისე, თითქოს დამქირავებელი თქვენი მეგობარი იყოს. პირდაპირობა კარგია, თუმცა ზომიერება მნიშვნელოვანია. არასოდეს ესაუბროთ დამქირავებელს “შენობით” იმ შემთხვევაშიც კი თუ თავად ასე მოგმართავენ – ეს ყოველთვის მიუღებელია და ნეგატიურ დამოკიდებულებას ქმნის.

მატერიალიზმი და ენთუზიაზმი

რა თქმა უნდა, ხელფასზე გიფიქრიათ, მაგრამ სანამ დამქირავებელი წამოჭრის ამ თემას, აჯობებს საკუთარი ინიციატივით არ წამოიწყოთ ამ საკითხის განხილვა. თუმცა ასევე მნიშვნელოვანია, რომ როცა კითხვას დაგისვამენ, თავი არ აარიდოთ პასუხს. თუ დამქირავებელი თქვენგან კონკრეტულ ციფრს ითხოვს, აუცილებლად უნდა უპასუხოთ. ნუ მოგერიდებათ, ნუ გაახმოვანებთ თქვენს მორიდებას, ნუ იტყვით, რომ “ხელფასი თქვენთვის არც ისე მნიშვნელოვანია”, ან “ციფრი თქვენ უნდა მითხრათ, მე კი არა”, ან “წარმოდგენა არ მაქვს რამდენი შეიძლება იყოს ხელფასი”. ასეთი დამოკიდებულება იმაზე მიუთითებს, რომ პირველივე შეხვედრისას იტყუებით: დიახ, ხელფასი მნიშვნელოვანია, რადგან თუ ქველმოქმედებისთვის არ მუშაობთ, ერთ-ერთი მიზანი ფინანსურია, ამიტომ ხელფასი საკმაოდ მნიშვნელოვანია. ასე შეხედეთ: მსგავსი პასუხის შემდეგ დამქირავებელმა რომ უფასოდ მუშაობა შემოგთავაზოთ, დათანხმდებით?! ამასთან, აუცილებლად სწორად უნდა აფასებდეთ თქვენს ღირებულებას. რა თქმა უნდა, დამქირავებელი გეგმავს შემოგთავაზოთ თვენი დროის ღირებულების მისეული აღქმა, მაგრამ ჯერ თქვენგან სურს მოისმინოს როგორ აფასებთ საკუთარ შესაძლებლობებს. მნიშვნელოვანია, რომ ციფრი, რომელსაც დაასახელებთ, იყოს რეალისტური და გადაჭარბებით არ აფასებდეს თვენს რეალურ შესაძლებლობებს.

შვებულება და შეღავათები

დამქირავებელთა 69% თვლის, რომ გასაუბრების დროს შეღავათებზე საუბარი, შვებულების დღეების დაზუსტება ან იმის გაგება, თუ როდის შეგიძლია აიღოთ დასვენების დღე იმ სამუშაოდან, რომელიც ჯერ არც კი მიგიღიათ, როგორც მინიმუმ, არ წარმოგაჩენთ საუკეთესო ჭრილში.

ნუ გალანძღავ ყოფილ უფროსს

თუნდაც ის ამის ღირსი იყოს, თქვენი ყოფილი სამუშაო ადგილისა თუ ხელმძღვანელობის შესახებ უარყოფითი გამოხმაურება არც ერთ ქულას არ მოგიმატებთ გასაუბრების დროს, პირიქით, დაგაკლებთ კიდეც. ამას გარდა, ფრთხილად იყავით  ძველ, ან ახლანდელ ორგანიზაციაზე საუბრისას: არ წამოგცდეთ კომერციული საიდუმლოება, არ გასცეთ ინფორმაცია, რომელიც არ არის საჯარო და რომელსაც შეუძლია შეარყიოს თქვენი კომპანიის რეპუტაცია.

ორიგინალურობა და ინდივიდუალურობა ყოველთვის მისასალმებელია, რადგან კონკრეტულად შენ და შენს პიროვნებას წარმოაჩენს. დამქირავებელს ბევრჯერ მოუსმენია გაცვეთილი ფრაზები, როგორიცაა მაგალითად, „მე მონდომებული მუშაკი ვარ“, „გუნდური მუშაობა შემიძლია“, „კრეატიული აზროვნებით გამოვირჩევი“. ნუ ისაუბრებ კლიშეებით. გულწრფელად წარმოაჩინე შენი დადებითი მხარეები.

რჩევები დაგეხმარებათ გაამახვილოთ ყურადღება დეტალებზე და არ ჩავარდეთ უხერხულ მდგომარეობაში.

(მოამზადა ნინი მოდრეკილმა)