ირაკლი ღარიბაშვილის სიმამრი თამაზ თამაზაშვილი „ნაციონალური მოძრაობის" ბრალდებას პასუხობს. თამაზაშვილი აღნიშნავს, რომ ირმა ნადირაშვილის მიერ ჩამოთვლილი პირებიდან მხოლოდ შს სამინისტროს გენინსპექციის უფროსი ზვიად ჯანყარაშვილია მისი ნათესავი. შეგახსენებთ, „ერთიანმა ნაციონალურმა მოძრაობამ" გუშინ ბრიფინგი გამართა და გზების მშენებლობაში ღარიბაშვილ-თამაზაშვილების ოჯახის ინტერესებზე ისაუბრა.
"აი, რა უნდა ვუპასუხო ეხლა მაგათ? ვერ ატყობთ, რომ ეგენი ყველანი არიან ავადმყოფები, რეებს იგონებენ? უკანონოდ ვიჯექი ერთი წელი და იმის მაგივრად, რომ ბოდიში მოიხადონ და სინანულის გრძნობა ჰქონდეთ, ეხლა კიდე რაღაცეებს მიგონებენ და ნერვებს მიშლიან.
არავითარი ნათესავი არ არის ის კაცი ჩემი. უბრალოდ დედამისი ყოფილა ჩვენი მოგვარე, შეუძლიათ გადაამოწმონ. ეგ საწყლები და უბედურები შეცდომაში შეიყვანეს. კი ბატონო, დის შვილია ზვიად ჯანყარაშვილი, მაგრამ დანარჩენები ჩვენი ნათესავები არ არიან. ვიღაცას დედა თამაზაშვილი ჰყავდეს და სადღაც დაინიშნოს, ყველა ჩვენი ნათესავი ხომ არ არის?
მოკლედ, მაგათ რეალობის გრძნობა აქვთ დაკარგული, შეხედე რას გვანან. ან თარგამაძე, რომელიც ლაპარაკობს, შეხედეთ რას ჰგავს. თუნდაც, ის ნადირაშვილი რომ გამოდის, გამწარებული. რატო არიან გამწარებული, ალბათ ირაკლის რომ წარმატებული გამოსვლა ჰქონდა," _ ამბობს თამაზ თამაზაშვილი "გურია ნიუსთან" საუბარში.
თამაზაშვილმა ასევე აღნიშნა, რომ გუშინ თამაზაშვილ-ღარიბაშვილის კლანის წევრებად მოხსენიებული პირები სასამართლოში ჩივილს აპირებენ.
"მიმართავენ სასამართლოს ისინი, ვისაც აბრალებენ ჩვენს ნათესაობას. ალბათ, უკვე მიმართეს კიდეც. კრიმინალიო - რომ იძახის ჩემზე თარგამაძე, კრიმინალი მე კი, არა ეგენი არიან, მთელი ნაციონალური ბანდა. გამოჩნდა ვინ არის კრიმინალი. რეაბილიტაცია თვითონ მაგათ გამიკეთეს, იმიტომ, რომ მთელი წელი ეძებეს ჩემზე კომპრომატი და აბსოლუტურად ვერაფერი ვერ ნახეს. მერე ციხე-ციხე დადიოდნენ და პატიმრებს ეხვეწებოდნენ, ტყუილად დაეწერათ ჩემზე რაღაც, მაგრამ ვერც იმათ დააწერინეს.
კრიმინალები არიან ეს თარგამაძე, ნადირაშვილი, ბოკერია, კანდელაკი, წიკლაური და ყველა. ჯერ ის ყოფილი პრეზიდენტი ნახეთ, ტელევიზორში რომ გამოვიდა, რასა გავდა, როგორ არის დასიებული. მე ადრე ვთქვი, რომ ჰეროინს ისუნთქავს მეთქი და იმიტომ აქვს ასე გასიებული ის ცხვირი ," _ ამბობს პრემიერ-მინისტრის სიმამრი.
(მოამზადა ანა ნოდიამ)
