პროფესიით ექიმია - მომავალი ფსიქიატრი, სასწრაფო დახმარების თანამშრომელი, მოყვარული მსახიობი, მედია - ჰოლდინგ „რეპორტიორთან" არსებული Art - სახელოსნო ,,კოლიბრის" რეჟისორი და გოგონა, რომელმაც "Youtube" დაიპყრო... ხატია სულაბერიძეს ოდესაში ვესაუბრეთ...

- ხატია, როგორ ფიქრობთ, საჭესთან რომ არ წაგეკითხათ ლექსები, მაინც ასეთი პოპულარული გახდებოდით?
- არ მიფიქრია, საერთოდ თუ გავხდებოდი პოპულარული, თუმცა, ალბათ, საჭემაც „შეუწყო" ამ ყველაფერს ხელი. "ქალი საჭესთან" ძალიან აიტაცა საზოგადოებამ და უფრო დიდი ინტერესით რთავდნენ ვიდეოს.

- ვისი ინიციატივა იყო სახელწოდება - "ქალი საჭესთან"?
- ზვიად კამკამაძის, რომელმაც პირველმა ატვირთა ვიდეო.

- საჭესთან ლექსის წაკითხვა თქვენი ცხოვრების განუყოფელი ნაწილი გახდა, ალბათ...
- ლექსებს ავტომანქანაში მანამდეც ვკითხულობდი, და რა თქმა უნდა, მომავალშიც აუცილებლად წავიკითხავ, თუნდაც, მხოლოდ ჩემთვის და თუ საზოგადოებას ექნება სურვილი, კვლავ მოისმინოს ჩემს მიერ წაკითხული ახალი ლექსები, რატომაც არა? ამაზე დიდი ბედნიერება არსებობს კიდევ?

- თქვენ გადაწყვეტილი გაქვთ გახდეთ ფსიქიატრი... როგორ ფიქრობთ, მოგიტანთ თუ არა  ეს პოპულარობას, თქვენს პროფესიაში წარმატებას?
- არ ვიცი... მაგაზე არ მიფიქრია, თუმცა, ლექსების კითხვა არ არის ჩემს პროფესიაში წარმატების მისაღწევად გადადგმული ნაბიჯი... მთავარია, ისწავლო და მუდმივად გქონდეს სხვათა დახმარების სურვილი... მე მზად ვარ ყველას დასახმარებლად...

- არასდროს მოგსვლიათ მუზა , ლექსი რომ დაგეწერათ?
- ვაფასებ ყველა პოეტს და პირდაპირ გეტყვით: ძალიან ამაღლებულები არიან ისინი ჩემს თვალში! ლექსებს, რომლებსაც ვკითხულობ, ჩემი დაწერილი მგონია, იმდენად მოდის ჩემს გულთან თითოეული სტრიქონი. მუზას და ლექსის წერას რაც შეეხება, ვფიქრობ, რომ ვერ შევძლებ... თუმცა, გამორიცხვით არაფერს გამოვრიცხავ... სხვათაშორის, იმდენი შესანიშნავი ლექსი გვაქვს, მგონი, არასოდეს მოხდება ის, რომ მე ვწერო.

- თქვენს პირად ცხოვრებაზე რას გვეტყვით?
- ჩემს პირად ცხოვრებაზე სასაუბრო არაფერია.

- და მაინც, არსებობს თუ არა თქვენს ცხოვრებაში  ის "ერთი"?
- ის "ერთი", რომელსაც თქვენ გულისხმობთ, არ არსებობს.

- უკრაინაშიც ხომ არ აპირებთ ხალხის "გულის დაპყრობას"?
- სიყვარული დაგეგმვის გარეშე მოდის და ასე ვერ ვიტყვი. მადლობა ყველას იმ სიყვარულისთვის, რომელსაც ჩემთვის იმეტებენ საქართველოში. აქ, ოდესაში ძალიან თბილი და კეთილი ადამიანები არიან,  მიყვარს ყველა და მადლობა ღმერთს, იგივეს ვგრძნობ აქაც...

- როგორც ვიცი,  მოყვარული მსახიობი ხართ.  გაქვთ თუ არა უფრო  სერიოზული გეგმები ამ სფეროში?
- ვაპირებ პარალელურად აქ, ოდესაში ჩავაბარო სარეჟისოროზე და ვნახოთ, რა გამოვა.

- საქველმოქმედო საღამოზე გკითხავთ:  ერთი უკვე გაიმართა, აპირებთ თუ არა მომავალშიც გააგრძელოთ  ეს საქმიანობა?
- აუცილებლად! ვაპირებ, ყოველთვის ვიყო იქ, სადაც საჭირო ვიქნები.

- ხატია, იქნებ გაგვიმხილოთ, რომელია ის "მესამე მელოდია", რომლის მოსმენის დროსაც ყოველთვის გიჩნდებათ  ლექსის წაკითხვის სურვილი...

- "sad piano (this will make you cry)"...

- ძალიან დიდი მადლობა. წარმატება თქვენს ყველა პროფესიაში და პირად ცხოვრებაშიც...
- მადლობა თქვენ.

ავტორი: თამუნა არჯევანიძე 

GOGAGGG.COM - სთვის

ფოტოები სპეციალურად "რეპორტიორისთვის" (ალეკო შარვაძე)