ყოფილი პოლიციელი, გელა მებონია სანდრო გირგვლიანის საქმეზე ახალ დეტალებს ახმაურებს. მისი განცხადებით, გირგვლიანის საქმე მომხდარიდან რამდენიმე საათში გაიხსნა, რაშიც თავადაც მონაწილეობდა, თუმცა მთაწმინდა-კრწანისის სამმართველოს უფროსის თამაზ ვასაძის კაბინეტიდან მასალები შინაგან საქმეთა სამინისტროს გენინსპექციის ერთ-ერთმა მაღალჩინოსანმა "გააქრო". მისივე განცხადებით ამ ამბის შემდეგ, ვასაძე თანამდებობიდან გაათავისუფლეს. ყოფილი პოლიციელი მზადაა დაინტერესების შემთხვევაში გამოძიებასთან ითანამშრომლოს.
"როდესაც ეს ამბავი მოხდა, შემთხვევის ადგილზე მე და ჩემი ოპერი ავედით. ადგილზე დაახლოებით 3-4 საათი ვიმუშავეთ. მასალები ამოვიღეთ კამერებიდან, საღამოს საქმე უკვე გახსნილი იყო. სამმართველოს უფროს თამაზ ვასაძესთან, კაბინეტში იდო საქმე. ჩვენ გვინდოდა ჟურნალისტებისთვის დაგვეძახა, მაგრამ დაგვასწრეს შინაგან საქმეთა სამინისტროს მაშინდელმა თანამშრომლებმა და ეს მასალები ჩვენი დიდი პროტესტის მიუხედავად წაიღეს. მეორე დღეს, თამაზ ვასაძეს გენინსპექციიდან მთელმა ჯგუფმა მოაკითხა და უთხრა: პოლიციიდან წადიო", - აღნიშნა გელა მებონიამ.
იგი გენინსპექციის იმ თანამშრომლის ვინაობას, რომელმაც მისივე თქმით, გირგვლიანის მკვლელობის ადგილიდან მოპოვებული მასალები წაიღო, ჯერჯერობით არ ამხელს, თუმცა, მზადაა, თუ პროკურატურა დაინტერესდება, სრულყოფილი ჩვენება მისცეს.
