რუსეთის მეცნიერებათა აკადემიის საერთაშორისო ურთიერთობების და ეკონომიკის ინსტიტუტის საერთაშორისო უსაფრთხოების ცენტრის ხელმძღვანელი, ალექსეი არბატოვი რუსეთის პრემიერ-მინისტრის, დიმიტრი მედვედევის განცხადებას ეხმაურება, რომელიც აცხადებს, რომ "რუსეთს საქართველოდან პოზიტიური სიგნალები ესმის".

როგორც არბატოვმა argumenti.ru-სთან საუბარში განაცხადა, რუსეთმა "ქართული თამაშები არ უნდა ითამაშოს" და საჭიროა მკაფიოდ ფორმულირებული ნაციონალური პოლიტიკა.

„თუმცა, მოდით განვსაზღვროთ რა გვინდა. საქართველოს ნაწილებად დაყოფა თუ მინიმუმ, საზღვართან ნეიტრალური სახელმწიფოს არსებობა? საქართველოში ახალი ხელისუფლების მოსვლის შემდეგ ვითარება ძირეულად შეიცვალა. სავარაუდოდ ამავე ძალის წარმომადგენელი დაიკავებს საქართველოში პრეზიდენტის პოსტს. მიუხედავად კონფლიქტებისა, რომელიც ბოლო წლებში გვქონდა, ამ ხალხს სურს რუსეთთან ურთიერთობების დალაგება. ამით უნდა ვისარგებლოთ იმისათვის, რომ ჩვენს სამხრეთ საზღვრებთან, ისეთ რთულ და მღელვარე რეგიონში, როგორიც არის კავკასია, გვყავდეს მეგობარი სახელმწიფო", -განაცხადა არბატოვმა.

მისივე თქმით, სწორედ ასეთ სახელმწიფოსთან ერთად შეძლებს რუსეთი გააკონტროლოს ვითარება და მოახერხოს შეიარაღებული ფორმირებებისა და ტერორისტული ჯგუფების ქმედებების შეჩერება. "საქართველოს გარეშე ამას ჩვენ ვერ მოვახერხებთ", - განაცხადა არბატოვმა.

მისივე თქმით, არაშორსმჭვრეტელურია ახლა საქართველოსთვის რაიმე სახის ულტიმატუმების წაყენება იმის თაობაზე, რომ თუ აღიარებენ აფხაზეთის და სამხრეთ ოსეთის დამოუკიდებლობას, დიპლომატიური ურთიერთობებიც მაშინ აღდგება.

„ასე რომ, ახლა არ არის დრო, წაუყენო საქართველოს ახალ ხელისუფლებას მკაცრი ულტიმატუმები, რომელიც გულწრფელად ცდილობს ჩვენთან ურთიერთობების დარგულირებას", - განაცხადა არბატოვმა.