ე.წ. სამხრეთ ოსეთის დე ფაქტო პრეზიდენტი ლეონიდ თიბილოვი საქართველოს მხრიდან ახალ სამხედრო ოპერაციას არ გამორიცხავს. მისი განცხადებით, „სამხრეთ ოსეთი საქართველოს მხრიდან ახალი სამხედრო აგრესიის შემთხვევისთვის მზად უნდა იყოს".
„საქართველოს ახალი ხელისუფლების წარმომადგენლები სამხრეთ ოსეთის რესპუბლიკის წინააღმდეგ განხორციელებული აგრესიის მოწმენი იყვნენ, თუმცა მათგან არცერთს პრეზიდენტ მიხეილ სააკაშვილის ქმედებების წინააღმდეგ პროტესტი არ გამოუთქვამს. ახლა ბევრი პოლიტიკოსი ამბობს, რომ იყო შეცდომები, მაგრამ ნუთუ შეიძლება, სამხედრო ოპერაციას სახელწოდებით "სუფთა ველი" შეცდომა უწოდო?", - განაცხადა თიბილოვმა.
ამასთან, მისივე თქმით, „საქართველოსთან დაკავშირებით განსაკუთრებული ილუზიები არ მაქვს და სამხრეთ ოსეთი ყველაფრისთვის მზად უნდა იყოს. ჩვენ უნდა გავამყაროთ ჩვენი სახელმწიფოებრიობა და ჩვენი შეიარაღებული ძალები ყოველთვის ბრძოლისუნარიანი უნდა იყვნენ,"- აღნიშნავს ლეონიდ თბილოვი.
