თბილისის მერის, გიგი უგულავას წინააღმდეგ ჩვენება ტარიელ ხიზანეიშვილმა მისცა. ამის შესახებ დღევანდელ პროცესზე გახდა ცნობილი. ყოფილი ვიცე-მერის ჩვენებით, მან სამწლიან უკანონობას ბოლო მოუღო. ჩვენებას თბილისის მერის ადვოკატი გამოეხმაურა და აღნიშნა, რომ ხიზანეიშვილს ჩვენების მიცემა აიძულეს. წინააღმდეგ შემთხვევაში, ადვოკატს აინტერესებს, რატომ არ არის პასუხისგებაში მიცემული ყოფილი ვიცე-მერი, თუ იგი სამწლიანი უკანონობის მონაწილე იყო? თბილისის მერმა დღევანდელ პროცესზე განაცხადა, რომ ბრალდების მხარის საკვანძო მოწმეებს ისეთი პირები წარმოადგენენ, როგორებიც სოზარ სუბარის მოადგილე, გიგა გიორგაძე, "ქართული ოცნების" "ნავში გადამსხდარი" ნიკო ხაჩირაშვილი და მოწმე თევდორაძე არიან. დღევანდელ პროცესზე მხარეებმა შესავალი სიტყვა წარმოთქვეს. დედაქალაქის მერის თქმით, ბრალდების მხარის შესავალ სიტყვაში რამდენიმე უზუსტობაა. კერძოდ, ბრალდების მხარე ტელეკომპანია "იმედის" ეპიზოდზე საუბრობს და ბადრი პატარკაციშვილსა და მინისტრ დავით კეზერაშვილს ახსენებს. როგორც უგულავამ აღნიშნა, ამ პერიოდში კეზერაშვილი მინისტრი აღარ იყო. ბადრი პატარკაციშვილი კი გარდაცვლილი იყო. გიგი უგულავას საქმეზე სასამართლო 30 აგვისტოს 11 საათზე განახლდება. თავდაპირველად, საქმის არსებითი განხილვის ფარგლებში, ტელეკომპანია "იმედის" ეპიზოდზე ბრალდების მოწმეები დაიკითხებიან.
