ეგვიპტეში დაღუპულ ჟურნალისტთა რაოდენობა ოთხამდე გაიზარდა, რამდენიმე ათეული კი დაშავებულია. ამის შესახებ ეგვიპტური სააგენტო Ahram Online იუწყება. გავრცელებული ინფორმაციით, დაღუპულია Sky News-ის ოპერატორი მიკ დინი, ეგვიპტელი ჟურნალისტი, 26 წლის ჰაბიბა აჰმედ ელაზიზი, სააგენტო RNN-ის ფოტოჟურნალისტი მოსაბ ელ-შამი და გაზეთ "ალ-აკბარის" ჟურნალისტი აჰმედ აბდელ გავადი.
ოთხივე ჟურნალისტი ქაიროში მომხდარი შეტაკებების დროს ცეცხლსასროლი იარაღით მიყენებული ჭრილობების შედეგად გარდაიცვალა. 
The Huffington Post-ის ცნობით, ეგვიპტის პოლიციამ ამერიკული გამოცემა Daily Beast-ის რეპორტიორი მაიკ გილიო დააკავა, რომელიც სასტიკად სცემეს. დაჭრილთა შორის არის "როიტერის" ფოტოგრაფი ასმა ვაგუ, რომელიც ერთ-ერთი ფრილანსერი ჟურნალისტის ინფორმაციით, ფეხში დაჭრეს, რის შემდეგაც კლინიკაშია მოთავსებული. 
ჟურნალისტთა საერთაშორისო ფედერაციის მონაცემებით, 2012 წელს მსოფლიოს სხვადასხვა ქვეყანაში ძალადობრივი შეტაკებების გაშუქებას 121 ჟურნალისტი და მედიის წარმომადგენელი ემსხვერპლა. 
ბოლო მონაცემებით, ეგვიპტეში 421 ადამიანია დაღუპული.