როგორც იცით, საქართველოს საფეხბურთო ნაკრები შეკრებას შვეიცარიაში გადის. ქეცბაიას გუნდი არაბეთის გაერთიანებული საემიროების ნაკრების წინააღმდეგ სათამაშოდ ნიონთან ახლოს ემზადება. ეროვნული ნაკრები 30 მაისს, 19-წლამდე ნაკრების ელიტრაუნდის შეხვედრას დაესწრო.
შეხვედრის შემდეგ ნაკრების თავკაცის გადაწყვეტილებით, საქართველოს ეროვნულ ნაკრებს ერთი დებიუტანტი შეუერთდა. თბილისის „დინამოს" 18 წლის ფეხბურთელი გიორგი პაპუნაშვილი, რომელიც ელიტრაუნდის შეხვედრებში ერთ-ერთი საუკეთესო იყო, შვეიცარიაში დარჩება და ეროვნული ნაკრების მაისურით იასპარეზებს. გიორგი „დინამოს" ძირითად გუნდში რამდენიმე თვის წინ დააწინაურეს და საკლუბო დონეზეც საკმაოდ კარგი სეზონი ჩაატარა.
საქართველოსა და არაბეთის გაერთიანებული საემიროების დაპირისპირება შვეიცარიაში, Stade des Arberes-ზე 3 ივნისს გაიმართება.
