„ლივერპულის" ფორვარდი ლუის სუარესი, მუხლის ოპერაციის შემდეგ, გამოჯანმრთელების მორიგ ეტაპზე გადავიდა.
22 მაისს, ინგლისის ჩემპიონატის საუკეთესო ბომბარდირმა მენისკის ოპერაცია გაიკეთა და ახლა ცდილობს რაც შეიძლება მალე აღიდგინოს ფორმა, რათა მსოფლიო ჩემპიონატზე იასპარეზოს.
გუშინ სუარესი თავის სანაკრებო პარტიორებს შეუერთდა, მაგრამ ექიმები არ ჩქარობენ დასკვნის გამოტანას, თუ როდის შეძლებს ლუისი მოედანზე გასვლას.
„ინფორმაცია ცოტაა, ლუისი განსაზღვრული გეგმით მუშაობს. მას გააჩნია ყველანაირი ფსიქოლოგიური და ფიზიკური ღირსებები, რათა მალე აღიდგინოს ფორმა, მაგრამ ჯერჯერობით მხოლოდ იმაში ვართ დარწმუნებულები, რომ პროგრესს განიცდის.
სამედიცინო თვალსაზრისით, სუარესის მსოფლიო ჩემპიონატზე მონაწილეობის მიღება არ გამოირიცხება. ჩვენ ვუთხარით მთავარ მწვრთნელ ოსკარ ტაბარესს, რომ უკუჩვენებები არ არის", - განაცხადა ურუგვაის ნაკრების ექიმმა ალბერტო პანმა.
