„ჩელსის" ვეტერანმა ფრენკ ლემპარდმა მიიღო გადაწყვეტილება კლუბი დატოვოს. ლონდონში 36 წლის ნახევარმცველმა 13 სეზონი ჩაატარა, 648 მატჩი მიიღო მონაწილეობა და კლუბის ისტორიაში, 211 გოლით, საუკეთესო ბომბარდირი გახდა.

„13 წლის წინ როცა „ჩელსიში" მოვედი, წარმოდგენა არ მქონდა, რომ ამდენ ხანს გავჩერდებოდი და ამდენ მატჩს გავმართავდი აქ. ეს კლუბი ჩემი ცხოვრების ნაწილი გახდა. მადლობას ვუხდი იმ ხალხს, რომელიც ამ დროის მანძილზე ჩემს გარშემო იყო.

რომან აბრამოვიჩმა გადაარჩინა „ჩელსი" და კლუბი სხვა დონეზე გაიყვანა. მადლობელი ვარ ყველა მენეჯერის, პარტნიორის და პერსონალის. კლუბი წინსვლას განაგრძობს. ეჭვი არ მეპარება, რომ „ჩელსის" წარმატება ელის.

როგორი გამოწვევაც არ უნდა მელოდოს მომავალში, „ჩელსი" მუდამ დარჩება ჩემს გულში. მალე ყველას დავემშვიდობები", - განაცხადა ლემპარდმა Sky Sports-თან საუბრისას.