კვლავ უცნობია სად გააგრძელებს ედენ აზარი კარიერას. ამ ეტაპზე, ჰორიზონტზე ორი ვარიანტი ჩანს: „ჩელსიში“ დარჩენა, ან „პსჟ“-ში გადაბარგება.

ავტორიტეტული ფრანგული გამოცემა France Football-ის ცნობით, პარიზული კლუბი თითქოსდა უკვე შეუთანხმდა „ჩელსის“ და მომავალ სეზონში ედენი „პსჟ“-ს მაისურით ითამაშებს.

მაგრამ საპირისპიროს იუწყება ლონდონური კლუბის ოფიციალური ვებგვერდი: აზარი არსად არ მიდის და მომავალ სეზონში 17-ნომრიანი მაისურის ნაცვლად, 10-ნომრიანით იასპარეზებს.

„ძალიან მიხარია, რომ „ჩელსიში“ 10-ნომრიანი მაისურით თამაში მომიწევს. ეს ჩემი საყვარელი ნომერია და ვიმედოვნებ, რომ მომავალ სეზონში წარმატებას მომიტანს“, - განაცხადა აზარმა.