ჰოლანდიის ნაკრების ნახევარმცველმა არიენ რობენმა განაცხადა, რომ 5-3-2 სათამაშო სქემა მის გუნდს მსოფლიო ჩემპიონატზე წარმატებას მოუტანს.

შეგახსენებთ, რომ საფრანგეთთან ამხანაგურ მატჩში განცდილი მარცხის შემდეგ (0:2), „ლომების" მთავარმა მწვრთნელმა ლუი ვან გაალმა გადაწყვიტა 4-3-3 -ს შეეშვას.

„საფრანგეთთან მატჩის შემდეგ ძალიან სერიოზული და ხანგრძლივი საუბარი გვქონდა ყველა ფეხბურთელთან. ჩვენ ვკამათობდით იმაზე, თუ რომელი სათამაშო სქემა იქნება საუკეთესო ამ გუნდისთვის.

მწვრთნელმა 5-3-2 ფორმაცია შემოგვთავაზა და ჩვენ ის მივიღეთ. ყოველთვის ვგრძნობთ ჰოლანდიური სკოლის გავლენას და მჯერა, რომ ჩვენი ძლიერი მხარე პოზიციურ თამაშშია, მაგრამ ამავდროულად, ზედმეტად არ უნდა გავიხსნათ", - განაცხადა რობენმა.