არგენტინელი ფორვარდის გადმობირებაზე პრეტენზიას მრავალი კლუბი აცხადებს, თუმცა პარიზელები მასთან გამომშვიდობებას აღარ აპირებენ.

Lequipe-ს ცნობით, „პსჟ"-ს, ეზეკელ ლავეცის შესაძლო ტრანსფერთან დაკავშირებით მილანის „ინტერმა" მიმართა, მაგრამ ფრანგებმა იტალიელები უარით გაისტუმრეს.

უფრო მეტიც, უახლოეს დღეებში „პსჟ"-ს ხელმძღვანელობა და ლავეცი ახალი კონტრაქტის პირობების შესათანხმებლად აპირებენ შეხვედრას.

„ინტერი" ერთი წელია ცდილობს ლავეცის გადმობირებას. იტალიელები ტრანსფერის განხორციელებასთან ზამთარში ძალიან ახლოს იყვნენ, თუმცა მოლაპარაკებები მაშინაც ჩაიშალა. ახალი არავისთვისაა, რომ „ინტერის" ხელმძღვანელობა სამხრეთამერიკელებზე ნადირობს და „პსჟ"-დან ლავეცისა და პასტორეს საკუთარ რიგებში ხილვა სურს.

ლიგა 1-ის გასულ სეზონში 29 წლის თავდამსხმელმა 34 მატჩში 9 გოლის გატანა შეძლო.