736 ფეხბურთელი და 32 მწვრთნელი - ისინი მზად არიან ბრაზილიური „კარნავალისთვის"! მსოფლიო ჩემპიონატის დაწყებამდე, გთავაზობთ მასში მონაწილეთა რაიმე ნიშნით ყველაზე განსაკუთრებულების ჩამონათვალს. გთავაზობთ საინტერესო, უინტერესო, მნიშვნელოვან და უაზრო სტატისტიკურ მონაცემებს მსოფლიო ჩემპიონატის მონაწილეთა შესახებ.

მუნდიალის ანთროპომეტრია:

736 ფეხბურთელიდან ყველაზე ზრდასრული კოლუმბიელი ფარიდ მონდრაგონია (მსოფლიო ჩემპიონატის დაწყების დღეს მას 42 წელი და 356 დღე შეუსრულდა. 43 წლის იუბილეს იგი ტურნირის მიმდინარეობისას იზეიმებს).

ყველაზე ახალგაზრდა - კამერუნელი ფაბრის ოლინგა (18 წლის და 31 დღის).

ყველაზე მაღალი - ინგლისელთა მეკარე ფრეიზერ ფორსტერი (201 სმ).

ყველაზე დაბალი - ჰონდურასელი მარვინ ჩავესი (156 სმ).

32 ნაკრებიდან გამოირჩევიან:

ყველაზე ასაკოვნები - არგენტინა (საშუალოდ 28 წელზე მეტი);

ყველაზე ახალგაზრდები - განა (საშუალოდ დაახლოებით 25 წელი);

ყველაზე მაღლები - გერმანია (საშუალოდ 185 სმ-ზე ოდნავ მაღლები);

ყველაზე დაბლები - ჩილე (საშუალოდ 176 სმ-ზე ოდნავ დაბლები).

დეკადების მიხედვით:

24 ფეხბურთელი 70-იან წლებშია დაბადებული (3,26%);

625 ფეხბურთელი - 80-იანებში (84,91%);

87 ფეხბურთელი - 90-იანებში (11,82%);

7 მწვრთნელი - 40-იანებში (21.8%);

12 მწვრთნელი - 50-იანებში (37,5%);

11 მწვრთნელი - 60-იანებში (34,3%);

2 მწვრთნელი - 70-იანებში (6,25%).

გამოცდილების მიხედვით:

- მონაწილეთა მხოლოდ 32%-ს აქვს მსოფლიო ჩემპიონატზე მონაწილეობის გამოცდილება. ამასთანავე, მუნდიალზე დებიუტი აქვს ბოსნიის ნაკრებს

- ეს უკვე მეხუთე მსოფლიო ჩემპიონატია იტალიის ნაკრების მეკარე ჯანლუიჯი ბუფონისთვის. 2006 წლის მსოფლიო ჩემპიონებიდან 4 ფეხბურთელი დღესაც ირიცხება იტალიის ნაკრებში: ბუფონი, პირლო, დე როსი, და ბარცალი. ესპანეთის ნაკრებში 2010 წლის ტიტულოვნებიდან 16 დღევანდელ 23-კაციან განაცხადშია.

- ყველაზე დიდი გამოცდილება სანაკრებო თამაშებში ესპანელ იკერ კასილიასს აქვს (154 მატჩი 2000 წლიდან). ყველაზე მეტი გატანილი გოლი გერმანელ მიროსლავ კლოზეს აქვს (69 გოლი 132 მატჩში).