C ჯგუფის პირველ მატჩში კოლუმბია საბერძნეთის ნაკრებს დაუპირისპირდება. ეს ყველაზე საინტერესო ჯგუფია, ვინაიდან ყოველი დაპირისპირება ინტრიგითაა გაჯერებული. ოთხივე გუნდი თითქმის თანაბარი ძალისაა და გასვლის მეტ-ნაკლებად ერთნაირი შანსი აქვთ.
აღნიშნული შეხვედრა სტადიონ „მინეირაოზე" თბილისის დროით 20:00 საათზე დაიწყება.
კოლუმბიელები, სავარაუდოდ, არც ამ შეხვედრაში უღალატებენ თავის სათამაშო სტილს და ფლანგებიდან შეუტევენ. მათთვის კოლოსალურად დიდი პრობლემაა რადამელ ფალკაოს ტრავმა, რომლის გამოც „მონაკოს" ლიდერი მუნდიალს გამოტოვებს, მაგრამ ამის შესახებ მთავარმა მწვრთნელმა ძალიან დიდი ხნის წინ იცოდა, ამიტომაც საკმაო დრო ჰქონდა იმისთვის, რომ გუნდი გადაეწყო და დანაკლისი ამოევსო. სავარაუდოდ, ფალკაოს შეცვლას გუტიერესი და მარტინესი ეცდებიან.
კოლუმბიელთა მთავარი პრობლემა შესაძლოა სწორედ მათივე სათამაშო სტილი აღმოჩნდეს. ბერძნებს ძალიან უყვართ დაცვიდან თამაში და ამისთვის ყველაფერი გააჩნიათ: გამოცდილი დაცვის ხაზი, მებრძოლი ჩამშლელი ნახევარმცველები, სწრაფი სალპინგიდისი ბურთის ამომტანად, ფლანგზე შეტევაში სწრაფად გადამსვლელი სამარასი და ამ ყოველივეს იდეალური დამაგვირგვინებელი კოსტას მიტროღლუ. ბერძენთა მთავარი მიზანი, დაცვის ხაზში ნაპრალების ამოვსებაა, რათა ბურთი არ გაუშვან. კონტრშეტევებზე თამაში კი თავის შედეგს ნამდვილად გამოიღებს.
წინასწარი შემადგენლობები:
კოლუმბია (4-4-2) : ოსპინა - სუნიგა, იეპესი, საპატა, არმერო - როდრიგესი, აგილარი, სანჩესი, გუადრადო - გუტიერესი, მარტინესი.
საბერძნეთი (4-3-2-1) : კარნეზისი - ტორისიდისი, პაპასტატოპულოსი, მანოლასი, ჰოლებასი - კარაგუნისი, მანიატისი, ციოლისი - სალპინგიდისი, სამარასი - მიტროღლუ.
ურთიერთშეხვედრები:
გუნდები ერთმანეთს ერთადერთხელ, 1994 წლის 5 ივნისს შეხვდნენ და კოლუმბიელებმა 2:0 იმარჯვეს.
საინტერესო ფაქტები:
- უკანასკნელ ორ მსოფლიო ჩემპიონატზე, რომელშიც საბერძნეთი ასპარეზობდა, ექვსიდან მხოლოდ ერთში შეძლეს გამარჯვების მოპოვება.
- კოლუმბიელების წაუგებელი სერია 7 თამაშიანია (3 მოგება და 4 ფრე)
- 2014 წლის მსოფლიო ჩემპიონატის შესარჩევი ეტაპის 7-დან 6 უკანასკნელ მატჩში ბერძნებმა მხოლოდ ორი გოლის გატანა შეძლეს.
Reportiori.ge-ს პროგნოზი: 0:0
ტოტალიზატორში თამაშის მოყვარულთათვის: X
